Szinka we grincojgu (Szynka we włoszczyźnie)

Na świynta moja Muter już połra lołt¹ kupuje wyndzōnoł² szinka, takoł w cołojści i do tego tak fajnie powiōnzano dratwōm³. Owijoł jōm potyn we alufolia⁴ i pieke⁵ bez⁶ godzina abo półtora we bratrurze⁷. Chop w kuchni- jak już wiycie- lubi sznupać⁸ po roztomajtych receptach⁹, wymyślać, eksperymyntować i tak prziszoł na ta idyja¹⁰, coby ta szinka uwarzić. A żeby z tego warzynioł do tyj szinki tyż wlazły jake nowe smaki, to sie jōm uwarzōł ze grincojgym¹¹. I niy dojś, że mu wyszła z tego luksusowoł szinka, to ze grincojgu mōg¹² sie jeszcze zrobić szałołt.

Co potrza?

szinka wyndzōnoł- jedyn kōnsek

opakowanie grincojgu- marchew, zeler, boryj, pietruszka (niyroz sie i trefi trocha kapusty)

trocha lubczyku (moge być suszōny)

cebula

trocha korzyni (pieprzu)

2-3 liście bobkowe¹³

Do garca nalyjcie wody i niech sie grzeje. Ze tyj szinki ściōngcie ta siatka- niy bōjcie sie, niy łozleci sie we warzyniu. Łobiercie sie marchewka, zeler i pietruszka, a jak woda napocznie wrzeć, to wciepcie¹⁴ do garca ta szinka, grincojg, prziprawy i trocha nad łogniym przipołlōnoł¹⁵ cebula. I tera niech sie to tak ze godzinka, a nojlepi i półtora, pomału pykoł¹⁶. Potyn wyciōngcie ta szinka, niech sie trocha ochōdzi¹⁷ i już mogecie sie jōm skosztować.

Joł żech sie pokrajoł ta uwarzōnoł marchew, pietruszka i zeler, dołech do tego pokrajane jabko, ze dwa małe kiszōne łogōrki, trocha majōnezu i już żech mioł ajnfachowy¹⁸ szałołt. Yno, że joł żech mioł do wykarmiynia yno dwie gamby¹⁹, gorzyj by bōło, keby²⁰ trza z tego zrobić szałołtu do całyj familije. Choć jak Wołs je dużo, to przeca niy idzie zrobić jednyj szinki, bo to przeca musi jyj łostać tyż i do sznitōw²¹, a jak warzicie 2 szinki, to i mogecie dać wiyncyj grincojgu… i fertich²².

Tyn wywar niystety niy je dobry do jedzynioł- sprōbowoł żech- bo je za słōny, ale i tak mōmy z tego kans²³ dobroci i trocha mani słōnoł szinka- Wasze serce bydzie rade²⁴ 😉 Smacznego 🙂