Kaczka imbirowo-sojowoł (W tłumaczeniu dziś nie poszaleję ;) )

Dzisiej po chałpach¹ to sie jy² przeważnie yno kury i świnie, niyrołz³ ftojś sie narychtuje⁴ hańdyka⁵, a przeca⁶ we sklepach tyla dobroci. Jeszcze połra lołt⁷ tymu to bōł⁸ problym, żeby kupić kajś⁹ gańś¹⁰, krōlika abo kaczka, a dzisiaj idzie je trefić nawet w tych nojbarzi ajnfachowych¹¹ sklepach. I bez¹² to trza z tego korzystać, bo przeca takoł pierś ze kaczki- jeszcze jak sie trefi na jakoł promocja- to nawet niy je droższoł łod tyj hańdykowyj, a zawsze mōmy jakejś urozmajcynie. Mie ta kaczka natchła tak jakojś na modła chińsko, ale musza pedzieć¹³, że bōła richtig¹⁴ dobro, a do tego niy trza sie przi ni¹⁵ narobić.

Co potrza?

1 pierś ze kaczki

5 łeżek zōłzy¹⁶ sojowyj*

5 łeżek łoleju¹⁷ sezamowego

trocha potartego imbiru (we Pszczynie na niego gołdajōm zezwōr)

pieprz

ze 2 łeżki mōnki pszynny do zagynszczynia zōłzy

*Kebyjście niy mieli takego łoleju, to sprōbujcie sie zrobić cojś takego: wejście sie 5 łeżek nasiōn sezamu i zetrzyjcie je ze 5 łeżkami oliwy na gładkoł masa (blynderym), a dali wszysko rōbcie, jak we recepcie- chyba, że ta Wasza zōłza bydzie trocha za gynstoł, to do duszynia tyj kaczki we brytfance wlyjcie tam kapka wody.

Nojlepi kebyjście¹⁸ mogli dać ta zōłza sojowoł, łolyj i imbir do tyj kaczki dziyń pryndzyj (zamarynować), żeby sie to wszysko fajnie przegryzło, ale jak niy mołcie tela czasu, to styknie i godzinka- przeca sie łeba niy urwiymy¹⁹ skuli²⁰ jedzynia. Nojlepi to wszysko wrajzić²¹ do jaki brytfanki, bo tam tyż bydymy ta kaczka potyn²² godzina abo i trocha dużi²³ dusić na małym łogniu. Niyskorzi²⁴ rozgrzyjcie sie piekarnik na 200 stopni i wrojście tam sama pierś (bez zōłzy) na 15-20 minut, żeby spiykła ji²⁵ sie skōrka i bōła fajnie chrupiōnco. Bez tyn czas mogecie rozfyrlać²⁶ sie trocha mōnki w jaki szolce²⁷ i zagyńścić tym zōłza we brytfance. Tak po prołwdzie to nasza kaczka je już fertich i idzie sie brać za jedzynie.

Tak samo mogecie tyż zrobić kaczka w całojści, yno wtedy trza dać trocha wiyncyj tych dodatkōw do zōłzy. Do taki imbirowo-sezamowyj (abo zezwórowo-sezamowyj 😉 ) kaczki to mogecie sie zjejś klōski, ryż, nudle abo i jako fajno bōłka. Smacznego 🙂