Kaczka wōniajōnco rozmarynym (Kaczka z nutą rozmarynu)

Jak mie już wlejzie¹ do gowy jaki recept² nowy… – cojsik te rymowanki mi sam niy pasujōm, ale jak żech już napisoł, to łostawia. Jak tyn recept wlejzie, to zarozki sie za niego biera, a inspiracje sōm wszyndzie: we lodōwce, we befeju³ i niy roz, niy dwa i na fynsterbrecie⁴ 😉 Już skōńcza te fandzolynie⁵ i biera sie za warzynie… – i zajś te rymy… 😉

Co potrza?

pierś ze kaczki

1 keliszek biołego wytrawnego wina

łotartoł skōra ze jednyj citrōłny

zaft⁶ ze jednyj citrōłny

połra gałōnzek rozmarynu (choć żech i kajś znod, że sie na niego gołdo tyż rozmaryjon)

ździebko soli i pieprzu

ze 2 łeżki mōnki kukurydzianyj (abo pszynnyj) do zōłzy

Jak mołcie trocha wiyncyj czasu abo szasu- jak to niyftorzi gołdali- to mogecie wino, skōrka, zaft, pieprz i rozmaryn (w całojści) dać do brytfanki ze kaczkōm na całoł noc, ale jak niy mołcie tego czasu za wiela, to abo łodstołwcie to yno na chwila, abo dejcie zaroz na piec i na małym łogniu duście ta kaczka tak 1-1,5 godziny.

Rozgrzyjcie piec na 200 stopni, wyciōngcie kaczka ze brytfanki, ponacinajcie nożym łod ni skōra we kratka i wrojście (bez zōłzy, skōrōm do wiyrchu) do bratruły⁷ na 15-20 minut, żeby ta skōrka sie tak fajnie na chrupiōnco przipiykła.

We brytfance mogecie ze zōłzy zebrać trocha tego tustego, co pływoł po wiyrchu i wyciepcie tyż te gałyńzie rozmarynu, bo łod niego arōmat już i tak tam łostanie, a idzie o to, żeby niy bōł aż za mocny. We jaki szolce⁸ we zimnyj wodzie rozrōbcie sie ze 2 łeżki mōnki i dejcie do warzōncyj sie zōłzy. Dosmakujcie sie jōm jeszcze solōm i pieprzym. I jak kaczka sie fajnie podpiecze, to mogecie sie brać za jedzynie. Takoł arōmatycznoł kaczka pasuje do wszyskego, joł żech sie zrobiōł dō ni⁹ frytki ze batatōw- to take słodke kartołfle- i szłołt, i… wszysko my ze mojōm Babōm zezarli¹⁰ 😉 Smacznego 🙂