Kotlet ze iberaszōngym (Schabowy z niespodzianką)

Smak ajnfachowego¹ schabowego zno kołżdy, ale styknōm² dwie łeżki jednego składnika i już na talyrzu lōnduje nōm inksze³ danie. Miyso marynowołech bez noc we bazyliowym pesto wymiyszanym ze mostrichym/zynfym/musztardōm i musza Wōm pedzieć, że sie opłaciōło 😉

1 kg schabu pokrōnego na 1 cyntymetrowe plasty

2 łeżki bazyliwego pesto*

2 łeżki mostrichu

tarto bōłka

2 jajca

sōl i pierz

olyj i trocha masła klarowanego do pieczynia

Miyso łoztrzaskejcie, posōlcie, popieprzcie i posmarujcie pesto zmiyszanōmym ze mostrichym. Nojlepi take posztaplowane⁴ miyso łostawić na noc. Potyn łozfyrlejcie⁵ we jednym talyrzu jajca ze solōm i pieprzym, a we drugi nasypcie tartyj bōłki. Wejście sie dwie widołki,⁶ chyćcie nimi miyso (niy bydziecie mieli zmazanych⁷ palcōw), potōnkejcie⁸ we jajcu, potyn we tartyj bōłce i wciepcie na łozgrzōno patelnie ze olejym i masłym klarowanym. Jak bydzie fajnie przibrōnołcōne⁹ ze kołżdyj strōny, to mogecie sie brać za jedzynie. Smacznego 🙂

*Pesto:

1 srogi¹⁰ pynczek bazylii

2 zōmbki czosku

3 łeżki prażōnego słōnecznika

30-40 g parmezanu

1/4 szklōnki oliwy

2/4 szklōnki oleju rzepakowego

sōl i pieprz

Wszyske składniki pesto wciepcie do blyndera- ze bazylii yno same listki, włōnczcie… i fertich¹¹. Potyn przełōżcie je do jaki krauzy¹² i tak moge se i tydziyń postołć we lodōwce- niyftorzi gołdajōm , że i jeszcze dużi, yno musicie pamiyntać, żeby na wiyrchu bōła zawsze warstwa oleju.