Placki kartołflane ze pieczarkowōm zōłzōm (Placki ziemniaczane z sosem pieczarkowym)

Niy znōm¹ chyba takego czowieka, kery by niy jołd² kejś³ plackōw kartołflanych. Za starego piyrwy⁴ nasze ōłmy⁵ piykły⁶ je na blasze i te placki zawsze bydymy⁷ nojlepi spōminać⁸. Potyn my powyciepowali⁹ ze kuchni piece, bo za kans¹⁰ bōło marasu¹¹ skuli¹² tego wōngla¹³ i trza bōło placki piyc na patelni we fecie¹⁴ abo ôleju. Choć joł¹⁵ żech już prōbowoł je piyc na teflōnowyj patelni bez tłuszczu- smak majōm inkszy¹⁶, mani¹⁷ cholesterolu, ale niy sōm tak fajnie chrōpiōnce. Do tych plackōw żech sie wynołkwiōł¹⁸ tako pieczarkowoł zōłza, kero¹⁹ na piōntek²⁰ bydzie idealno, nawet dlo nojbarzi²¹ pobożnego Hanysa²² 😉

Co potrza?

Placki:

1 kg ôbranych kartołfli

1 cebula

2 zōmbki²³ czosku

5 -6 łeżek mōnki pszynnyj

2 jajca

sōl i pieprz

ôlyj do smażynia (no chyba, że chcecie na fecie)

Zōłza:

0,5 kg pieczarkōw

400 ml śmietōnki²⁴ (12 abo 18 %)

łeżka masła klarowanego

1 łeżeczka majeranku (kajś żech widzioł, że go piyrwy mianowali majerōnek)

0,5 łeżeczki mielōnego kminku

0,5 łeżeczki kurkumy (moł fajno żōłto farba i je bardzo zdrowoł)

0,5 łeżeczki czosku niydźwiedziego (abo jedyn zōmbek czosku)

sōl i pieprz

trocha mōnki do zagynszczynia zōłzy

Kartołfle, cebula i czosnek trzymy na miazga, dociepujymy mōnka, prziprawy, jajka, miyszōmy i placki mōmy fertich²⁵ do pieczynia. Joł całe szczyńście mōm takego robota, kery mi te wszyjske kartołfle potarł²⁶, bo piyrwy to jak bych²⁷ sie niy staroł, to zawsze mi kajś²⁸ tyn palec ujechoł²⁹ i rynka bōła trocha pocharatanoł. Choć połra razy żech tar kartołfle tyż na tych rubszych ôczkach i to mogecie być zicher³⁰, że danie bydzie bez czerwōnych krwinek 😉

Tera bierymy sie za zōłza. Pieczarki pokrajcie na mańsze kōnski- ale bez przesady, bo jak mołcie za kans czasu, to sie lepi poczytejcie ksiōnżka- i wciepcie na suchoł patelnia, żeby trocha ôdparowały woda. Mōm nadzieja, że niy musza Wōm pisać, że ta patelnia moł być bez tyn czas na piecu 😉 Jak już trocha ta woda ôdparuje, dociepcie tam masła i prziprawy. Potyn jeszcze śmiytōnka i już zōłza prawie fertich. Keby³¹ bōła za rzołdko³², to mogecie dać tam trocha mōnki rozrobiōnyj we zimnyj wodzie i jōm zagyńścić.

Jak chcecie piyc³³ placki bez ôleju i fetu, to yno leko³⁴ natłuście patelnia i biercie sie za pieczynie, a jak chcecie mieć je take fajnie chrōpiōnce, to nalyjcie na patelnia ôleju, a jak sie ôzgrzeje, ponakłołdejcie po łeżce plackowego ciasta. Jak już placki bydōm ze kołżdyj strōny fajnie przibrōnołcōne³⁵, to je przeciepcie na papiyrzany ³⁶ryncznik, żeby tyn fet w niego trocha wsiōnknōł³⁷.

Takego placka mogecie sie wciepnōńć³⁸ na talyrz, ôblołć³⁹ zōłzōm i… smacznego 🙂