Smak tych polyndwiczek nawet może niyftorym1 spōmnieć wakacje we Prowansji, bo mołcie sam zioła prowansalske, a przeca i cebula je podstawōm kuchni francuskyj. Lubia polyndwiczki bez to, że raz-dwa sōm fertich2 i idzie siadać do stołu, sōm fajnie miynke i arōmatyczne, a jak do tego bydzie jeszcze zōłza ze karmelizōwanōm cebulōm… niebo we gymbie.
Co potrza?
1 polyndwiczka wieprzowŏ (choć Wy mogecie ich sam wciepnōńć3 i wiyncyj, yno trza dać tyż wiyncyj inkszych4 składnikōw)
1 wiynkszŏ cebula
2 łeżeczki cukru
pŏra łeżek oliwy
łeżeczka ziołōw prowansalskich
250 ml śmiytōnki krymōwki
ze dwie łeżeczki pokrōnyj natki pietruszki
sōl i pieprz
Polyndwiczka pokrejcie5 na cyntymetrowe talarki i przipiyczcie na leko natłuszczōnym tyglu (patelni). Jak już ze kŏżdyj strōny sie fajnie przibrōnŏci6, to jōm dejcie na bok. Na patelnia wciepcie cuker, a jak sie zacznie karmelizować, wciepcie ku niymu pokrōnŏ cebula i razym to wymiyszejcie. Niyskorzi dejcie polyndwiczki, sōl, pieprz, zioła prowansalske i śmiytōnka. Jak już sie ta ôstatniŏ trocha odparuje, to wciepcie tam pietruszka i już mogecie pomału7 wołać dōmownikōw na ôbiŏd 😉 Smacznego 🙂
1niektórym
2gotowe
3wrzucić
4innych
5pokrójcie
6przypiecze
7powoli
Dodaj komentarz