Schab niy-byle-jaki (Schab niebanalny)

Jak żech szoł¹ do sklepu (abo jak by to niyftorzi pedzieli² : do kaufhauzu), to kupowołech te miyso na trocha inksze danie, ale jak żech napoczōn³ warzić, to mie cojsik naszło. Czowiek kōmbinuje, ale tak po prołwdzie⁴ nawet niy wiy, co to z tego wszyskego wyjdzie. Jak żech opiykōł miyso, to żech prziszoł na to, że we lodōwce sie chōdzi⁵ flaszka cydru i łon aże sie prosi, żeby go dolołć do brytfanki. Jak miyso sie dusiōło ze grincojgym,⁶ to żech sznupoł⁷ po befyju⁸ (choć te nasze befyje, to już niy sōm take jak piyrwy), coby znojś cojsik, co by szło dać do szałołtu⁹ i tak sie sam wziyna ta soczewica. Jabko? Leżało na fynsterbrecie¹⁰– co sie miało marnować. I tak sie z tego wziyno cołke niy-byle-jake danie.

Co potrza?

1 kg schabu

1 cebula

szklōnka cydru (niy wytrawnego!)

1 zōmbek czosku abo trocha czosku niedzwiedziego

połra liści bobkowych¹¹

ze 2 łeżki masła klarowanego

1 porcja grincojgu (marchew, pietruszka, zeler i boryj¹²)

szklōnka zielōnyj soczewicy

1 jabko

połra łeżek mojōnezu

150 ml gynstyj¹³ śmietōnki (moge być 12%)

połra łeżek mōnki pszynny

sōl i pieprz

Na patelnia żech wciep mało łeżeczka masła klarowanego, tela, żeby niy bōła za sucho, ale tyż żeby niy bōło go za kans¹⁴, bo żech sie pomyśloł, że jak go dōm mani^15, to przi podpiykaniu schabu (w całojści) niy bydzie to tak pierzińsko pyrskać.¹⁶ I to sie nawet udało, na srogim¹⁷ łogniu żech go podpiyk ze kołżdyj strōny, a kuchnia niy bōła zmaraszōno.¹⁸ Niyskorzij¹⁹ żech tyn schab łodstawiōł na chwila, żeby te soki z miysa trocha wlazły nazod rajn.²⁰ Bez tyn czas na reszcie masła klarowanego we brytfance żech zeszklōł pokrōno²¹ cebula i wlołech dō ni szklōnka cydru i szklōnka wody. Wciepłech do tego miyso, dołech tam pieprzu, liście bobkowe i posułech²² trocha czoskym niydźwiedzim. Sōl dołech dopiyro na sōm kōniec, do zōłzy. Przikrōłech brytfanka i to sie tak ze godzina pykało na małym łogniu- co jakiś czas idzie²³ tyż łobrōcić te miyso na drugo strōna.

Po godzinie dociepłech do tego marchew, pietruszka i zeler- boryj żech sie łostawiōł do szałołtu.

W tym czasie uwarzōłech tyż zielōno soczewica- tak ze 20-25 minut, żeby fajnie zmiynkła.

Jak grincojg bōł miynki, to żech go wyciōng na deska, pokrajōł i wciep do miski. Miyso żech odłożōł na chwila na talyrz, żeby ochōdło i lepi sie je krajało.

Do zōłzy dołech ze 2 łeżki mōnki rozfyrlanyj²⁴ ze zimnōm wodōm i śmietōnka ( wymiyszejcie jōm pryndzyj ze 1 kelniōm²⁵ zōłzy, żeby sie niy ściekła²⁶). Dosmakowoł żech jōm solōm i pieprzym i wyciepnōł bobkowe liście.

Miyso pokrajoł żech na plastry i wciep do zołzy, żeby sie podgrzoło i przegryzło.

Idymy nazod do szałołtu: boryj i jabko pokrołech na małe kōnski²⁷ i dołech do miski, we ftoryj bōła już reszta grincojgu. Dociepnōł żech do tego łodcedzōno soczewica, połra łeżek majōnezu, trocha pieprzu, soli i porzōndnie żech wymiyszoł.

Nareszcie prziszoł czas na jedzynie. Na talyrz idzie szałołt, kōnsek schabu łoblōny²⁸ zōłzōm i… smacznego 🙂