Szinka po bajerowsku (Szynka po bawarsku)

Jak żech we sklepie bez cufal¹ trefiōł² take fajne bajerowske mostrichy³, to mie zarozki⁴ do gowy przilatywały roztomajte⁵ pomysły. A że lubia i szinka, i pszyniczne piwo, to recept⁶ bōł⁷ prawie fertich⁸. Szinka wyszła arōmatycznoł, miynkoł i aże sie rozpuszczała we gymbie⁹ 😉

Co potrza?

2 kule miysa ôd szinki

3 łeżki słodkego mostrichu bajerowskigo (nojlepszy taki, kery¹⁰ majōm do tych biołych wōsztōw¹¹ we München)

3 łeżki ôstrego mostrichu bawarskigo

szklōnka piwa pszynicznego (Weizenbier)

troszka mōnki do zagynszczynia zōłzy

Kebyjście mieli problym ze kupiyniym takich bawarskich mostrichōw, to mogecie dać trzi łeżki jaki ôstryj musztardy i trzi słodkyj, do keryj mogecie dociepnōńć połra roztrzaskanych gojździkōw, ziela angelskego, trocha gałki muszkatałowyj i nojlepi tyż trocha brōnołtnego¹² cukru.

Dziyń pryndzyj¹³ wciepcie¹⁴ do gorka po 3 łeżki tych mostrichōw i wymiyszejcie ze piwym.

Miyso ôpōkejcie¹⁵ i wciepcie do gorka do tyj marynaty na całoł¹⁶ noc. Na drugi dziyń dejcie¹⁷ to na piec i niech sie to tak pykoł¹⁸ na małym ôgniu bez 3-4 godziny. Potyn marynata ôstołwcie¹⁹ na ôgniu i niech ôna trocha odparuje, a miyso wciepcie na 20-30 minut do nagrzōnyj na 200 stopni bratruły²⁰, żeby sie fajnie przibrōnołciōło²¹. Keby²² zōłza²³ bōła za rzołdkoł²⁴, to mogecie rozpuścić w zimnyj wodzie trocha mōnki (pszynnyj, kartołflanyj abo ze majsu²⁵) i niōm jōm zagyńścić. Jak już miyso bydzie²⁶ fertich, to je pokrajcie na szajby²⁷ i na talyrzu polyjcie zōłzōm. Do tego mogecie dać: klōski²⁸, nudle²⁹, uwarzōne kartołfle³⁰, frytki abo i jako fajno żymła³¹. Smacznego 🙂