Szinka we koli (Szynka w coli)

Hamerykōny¹ wymyślōły kola (cola), to i potyn prziszli do wymyślynia taki szinki. We Europie zrobiōła sie popularnoł, bo jōm narychtowała² takoł angelskoł kuchara, a to, co sam³ znojdziecie⁴, to je chopskoł wariacja na tymat tego wciepowania⁵ świni do koli. Niy trza sie przi tym natrołpić⁶, a to, co potyn wjedzie na stōł, to fajne, arōmatyczne, rōżowe miyso z takim lekim słodkim posmakym.

Co potrza?

Szinka- jedna kula miysa

sōl do pyjklowania⁷ (jak niy chcecie pyjklować, to mogecie jōm zamoczyć we normalnyj soli, yno, że te miyso niy bydzie miało taki fajnyj farby⁸)

2 litry koli (joł tam biera normalno coca-cola, ale mogecie wziōńć i jakoł inkszoł, byle niy takoł bez cukru- z takōm to sie lepi dać pokōj⁹)

cebula

połra gojździkōw¹⁰

3 liście bobkowe¹¹

połra ziorek ziela angelskego

1-2 łeżki mostrichu¹²

1-2 łeżki miodu

Sōl do pyjklowania ôzpuśćcie¹³ sie we wodzie, wciepcie tam szinka, a nojlepi wejście sie jeszcze szprica¹⁴ (takoł wiynkszoł kupicie za połra złoty we aptyce) i powciskejcie ta zalywa tyż rajn¹⁵. Styknie,¹⁶ jak sie to baje¹⁷ pyjklowało bez noc. Na drugi dziyń wyciōngcie¹⁸ ta szinka ze pyjklowania, opōkejcie¹⁹, wciepcie²⁰ do gorka i zalyjcie kolōm. Dociepcie tam jeszcze gojździki, ziele angelske i liście bobkowe. Cebula przekrejcie²¹ na pó i przipołlcie²² jōm leko na piecu- jak do nudelzupy.

Tera niech sie ta nasza świnia trocha powarzi- aby godzina na 1 kg szinki.

Jak już bydzie fertich,²³ to jōm wyciōngcie, posmarujcie po wiyrchu mostrichym zmiyszanym ze miodym i wrojście²⁴ na 20 minut do bratruły²⁵ ôzgrzōnyj na 200 stopni. Bez tyn czas mogecie sie ôdlołć²⁶ trocha tyj koli, we ftoryj sie warzōła szinka i jōm ôdparować (zredukować). Jak sie zrobi fajnie gynstoł zōłza, to mogecie sie niōm²⁷ potyn polołć miyso.

Jak sie nasza szinka trocha przibrōnołci²⁸, to jōm wyciōngejcie i biercie sie za jedzynie. A co Wōm ôstanie²⁹, to idzie zjejś na drugi dziyń na zimno na sznicie³⁰ abo jaki bōłce³¹. Smacznego 🙂