Tarta 3B- Brokuł, Boczek i Boryj (po polsku nie będzie 3B ;) )

Tarty robia łod¹ jakegojś czasu. Niy biere² to kans³ czasu, na wiyrch⁴ idzie powciepować⁵ roztomajte⁶ rzeczy i do tego wcale niy⁷ je droge. Kebyście⁸ czytali te recepty⁹ we ksiōnżkach, kaj¹⁰ kołżōm¹¹ zrobiōne ciasto trzimać bez¹² godzina we lodōwce, potyn- nim wrazicie¹³ je do pieca- na wiyrch wysuć¹⁴ specjalne fasolki… – to sie idzie przestraszyć. Joł¹⁵ tam sie niy byda¹⁶ z tym tak smolōł,¹⁷ a niy bōło jeszcze bezuchu,¹⁸ co by marudziōł- nawet jak mi bez cufal¹⁹ jedna zleciała²⁰ na ziymia 😉

Co potrza?

Spodek:²¹
180 g mōnki pszynny
80 g masła
trocha wody (2-3 łeżki )
pó²² łyżeczki soli

Na wiyrch:

150 g boczku- co to po ślōnsku barzi²³ sie nazywo wyndzōnka, ale… 3B… jak to godajōm: licentia poetica 😉
mały boryj²⁴
mały brokuł
200 ml śmiytōnki  (joł tam lubia 36%)
2 abo 3 jajca
połra plastrōw żōłtego syra²⁵
sōl i pieprz
gałka muszkatałowo

Nojprzōd spodek. Wciepcie²⁶ wszyske składniki do miski i wyrōbcie na jednolitoł masa. Potyn wejście sie 2 kōnski²⁷ papiōru do pieczynioł, wrołźcie²⁸ sie pomiyndzy na środku te ciasto i nudelkulōm rozwałkujcie na łokrōngło.²⁹ Włōnczcie sie piec na 200 stopni. Jedyn papiōr ściepcie³⁰ i tōm sebleczōnōm³¹ strōnōm połōżcie na formie do tartōw (jak taki niy mołcie,³² to sie wejście wiynkszo forma na torta abo jako inkszo okrōngłoł). Ta reszta ciasta, co wyłajzi³³ ze formy, mogecie³⁴ urwać i wkleić kaj³⁵ na środku- co sie moł³⁶ marnować. Tera wrołźcie tyn spodek do pieca na 15 minut.
Bez tyn czas³⁷ boczek dejcie³⁸ na patelnia i niech sie fajnie podpiecze. Pod kōniec na chwila wciepcie tam tyż pokrōny³⁹ boryj. Ze brokuła poobcinejcie te różyczki- ta reszta   łodygi sie na drugi dziyń mogecie wciepnōńć do jaki zupy. Śmiytōnki ubijcie, dociepcie dō ni jajca, trocha soli, pieprzu i gałki muszkatołowyj i wymiksujcie.
Jak już spodek baje⁴⁰ podpieczōny, poukłołdejcie na nim te brokułowe różyczki, na to wysypcie boczek z borejym, łoblyjcie śmiytōnkōm z jajcami i przikryjcie plastrami syra. Dejcie na 30 minut do pieca na 180 stopni i fertich.⁴¹ Pokrejcie ta tarta, jak jake ciasto i… smacznego 🙂