Udzik po żydowsku (Udko po żydowsku)

Jak sie już Wōm¹ zmiyrzły² kurczaki posute³ samōm⁴ solōm, pieprzym i paprykōm, to joł⁵ bych Wołs chcioł zachyńcić do tego richtig⁶ ajnfachowego⁷ dania. Nic sie niy trza natrołpić⁸, a smak mołcie blank⁹ inakszy¹⁰, a do tego zawsze sie jeszcze mogecie poasić¹¹, że warzicie¹² dania ze kuchniōw ze cołkego¹³ świata. Sam żech napisoł, że to sōm udziki, ale jak chcecie, to mogecie¹⁴ tak narychtować i całoł¹⁵ kura abo i yno filety ze podudziōw.

Co potrza?

1 kg udzikōw abo podudziōw

1 łeżka pomelanego¹⁶ kminku

płaskoł łeżeczka cynamōnu

płaskoł łeżeczka kardamōnu (yno same ziorka¹⁷ ze środka)

płaskoł łeżeczka papryki (ôstryj¹⁸ abo słodkyj)

sōl i pieprz

2-3 łeżki oliwy

pynczek¹⁹ świyżyj miynty do posucia²⁰ po wiyrchu

Nojlepi narychtujcie²¹ te nasze udziki dziyń naprzōd²². Mogecie je upiyc we naczyniu żaroodpornym abo rynkołwie²³ do pieczynia. Umyte miyso²⁴ posmarujcie oliwōm, posujcie pomiyszanymi prziprawami i fajrant.²⁵

Na drugi dziyń rozgrzyjcie bratruła²⁶ na 180 stopni i wrojście²⁷ tam nasze udziki we zawartym²⁸ rynkołwie abo przikrytym naczyniu żaroodpornym na pó godziny. Potyn rozeżnijcie²⁹ tyn rynkołw abo ôtwōrzcie naczynie żaroodporne i niech sie to terozki posiedzi we bratrurze ze pó godzinki, co by sie nōm fajnie przibrōnołciōła³⁰ skōra ôd tych udzikōw. Takego kurczaka mogecie sie zjejś z jakim szałołtym³¹, bōłkōm³² abo i kartołflōma³³. Jak już skōrka bydzie fajnie przibrōnołcōnoł, to go wyciōngcie ze bratruły, posujcie pokrajanōm miyntōm i smacznego 🙂