Wołowe klopse we arōmatycznyj zōłzie ze mascarpōne (Pulpety wołowe w aromatycznym sosie)

Wołowe klopse we arōmatycznyj zōłzie za mascarpōne-małe

Na handlu kupiōłech richtich¹ fajne wołowe miyso i już mie korciōło, żeby co powynŏkwiać². Mascarpōne bōło we lodōwce, roztomajte³ ziela na balkōnie i resztka suszōnych grzibōw we krauzie⁴… i tak żech prziszoł do tego receptu⁵ 🙂

Co potrza?

800-1000 g pomelanego⁶ miysa wołowego

250 g mascarpōne

100 g pokrōnyj⁷ we kostka wyndzōnki⁸

2 zōmbki czosku

sōl i pieprz

łeżeczka majerōnku (choć jŏ żech doł gałōnzka świyżego)

kōnsek⁹ rozmaryjōnu¹⁰ (10 cm abo łeżeczka suszōnego)

gałōnzka bazylii (abo poła łeżeczki suszōnyj)

2 gałōnzki miynty (jak niy mŏcie taki we zygrōdce, to nojwyżyj mogecie sie tyn składnik odpuścić)

trocha lubczyku (zielōnego, suszōnego abo taki przyprawy, co to jōm nasze Ôłmy dŏwały, ale yno kedy mŏcie takŏ bez glutaminianu sodu 😉 )

pŏra kōnskōw suszōnych prawdziwkōw (mogecie je prydzyj trocha pokrajać)

łeżka masła klarowanego

łeżka oliwy

Do miysa dejcie oliwa, wyciście czosnek, wciepcie soli, pieprzu, wymiyszejcie i ukulejcie klopsiki. Na tygel¹¹ dejcie trocha masła klarowanego i podpiyczcie na nim miyso. Potyn przeciepcie¹² je do jakego gorka abo brytfanki, a na tygel dejcie wyndzōnka. Kej sie przibrōnołci¹³, to dociepcie jōm do miysa, dolyjcie tam trocha wody (mogecie niōm pryndzyj przepōkać¹⁴ tyż tyn tygel, kej sie podsmażało miyso, żeby nōm niy uciykły te wszyjske smaki), wciepcie prziprawy i niech sie to aby ze pō godziny podusi. Niyskorzyj¹⁵ mogecie wyciepnōńć gałōnzki ziela (ône już arōmat oddały), wyciōngnōńć na jaki talyrz klopsiki i do zōłzy dać mascarpōne (po leku¹⁶, żeby nōm sie to niy zwŏżōło¹⁷). Kebō Wōm ta zōłza bōła za rzŏdkŏ¹⁸, to mogecie jōm trocha zagyńścić mōnkōm (łozmiyszejcie sie trocha kartŏflanyj abo pszynnyj mōnki we zimnyj wodzie i dolyjcie do zōłzy). Terŏzki jeszcze nōm ôstało dosmakowanie tych naszych eksperymyntōw i idzie sie brać za jedzynie. Przed wciepniyńciym na talyrz jeszcze mogecie na chwila dać miyso do gorka, żeby sie trocha ogrzoło i pokōmpało¹⁹ we tyj fajnyj zōłzie 😉 Smacznego 🙂