Ło śliwce, co niy macała gorzołki, ale sie zegziōła ze szokoladōm (Likier czekoladowy aromatyzowany śliwką)

Ciynżko pedzieć¹, czy to jeszcze je sznaps², czy już kryjm, ale jedno je pewne- ta wersja je yno dlo ciyrpliwych. Śliwki muszōm wisieć nad wōdkōm aby ze 2 tydnie³, a jak fto by chcioł pryndzyj⁴, to mu z tego wyjdzie czorny szajerkōniak (recept⁵ na bioły znojdziecie sam: http://chopwkuchni.pl/?p=492 ) .

Co potrza?

6 żōłtek

0,5 szklōnki cukru

100 g masła

2 łozpuszczōne⁶ szokolady (nojlepi gorzke)

jedna halba ⁷(czystyj)

100 g suszōnych śliwek

Do srogi krauzy⁸ wlyjcie halba, a na wiyrchu w jaki gazie powiejście śliwki.  Zakryńćcie ta krauza i zapomnijcie ło ni na jake 2 tydnie- kebyjście umieli ło ni zapōmnieć na dużi⁹, to nawet bydzie lepi.
Jak już tyn czas minie, to odłōżcie śliwki do jakego ciasta (recept już niydugo 😉 ), a tyn śliwkowy sznaps idzie na nastympny poziōm naszego szpilu¹⁰ ;).

Joł mōm blynder i w takim łonym to wszyske ajerkōniako-podobne sznapsy sie zrobiōm raz-dwa. Wciepcie¹¹ tam masło, żōłtka, cuker i włōnczcie blynder- pamiyntejcie, żeby na wiyrch¹² dać pokrywka, chyba, że lubicie maras¹³ we kuchni 😉 Jak sie to trocha wymiyszo, to wlywołcie tam rozpuszczōno (we jaki misce nad gorkym ze wrzōntkym|) szokolada, trocha gorzołki¹⁴ i włōnczołcie. Potyn reszta halby i niech sie to tam połra¹⁵ minut fajnie pomiyszoł.

Jak niy mołcie blyndera, to wciepcie masło i cuker do plastikowyj miski i włōnczcie sie mikser. Za chwila dociepcie¹⁶ tam żōłtka i miksujcie, aż cuker sie rozmiyszoł- tak sie strasznie z tym niy smōlcie¹⁷, bo jak przidzie gorzołka, to sie to jeszcze lepi łozpuści¹⁸. Tera wlywejcie pomału tyn śliwkowy sznaps i dali miksujcie. Sprōbujcie, czy cuker sie dobrze łozpuściōł, a jak wszysko sie dobrze połōnczōło, to idzie¹⁹ tyn nasz sznaps ło barokowym mianie²⁰ wlywać do jaki krauzy- ze flaszki niy szło by tego nalołć. A jak już ta zegzōno śliwka sie trocha łochōdzi i do jaki szklōnki sie wejźniecie łeżka abo 2, abo 3… to już yno smacznego 🙂