Nolywka ze czornych jagōdkōw (Nalewka z czarnej porzeczki)

Napocznōł żech jōm rychtować¹ połra lołt² do zadku³ ze mojōm Teściowōm i tak nōm zasmakowała, że do dzisiej kołżdego roku jōm nastawiōmy. Teściowa robi jōm niyroz trocha słabszoł, moja Muter- bo łona tyż sie w te nalywkowanie wciōngła⁴– niyroz robi yno trocha mocniyjszy kōmpot, ale przeca kołdży robi tak, jak mu smakuje. Choć w tym roku żech jōm przegołdoł⁵, co by kupiōła wiyncyj szpyrytusu i coś mi sie zdołwo⁶, że łod ni kōmratki⁷ bydōm miały z tego trocha wiyncyj uciechy. Ta farba⁸, tyn smak je niy do opedzynia⁹ – lekko goryczka, przełōmanoł tōm wygrzōnōm we słōńcu, gynstōm słodkojściōm. Jak jōm zrobicie rołz, to na drugi rok te jagōdki same Wōm bydōm włajzić do krauzy.

Co potrza?

2 kg czornych jagōdkōw

0,5 litra szpyrytusu

0,5 l gorzołki¹⁰

1,5- 2 szklōnek cukru

Umyte i obrane ze tych łogōnkōw (Polołki¹¹ gołdajōm na nie szypułki) jagōdki wciepcie do srogi krauzy¹², zalyjcie gorzołkōm i szpyrytusym i zapōmnijcie ło nich. Jak Wōm sie ło nich spōmni¹³ – te połra tydni to już im dejcie- to ślyjcie¹⁴ gorzołka do jaki flaszki¹⁵, a jagōdki po wiyrchu¹⁶ posujcie¹⁷ cukrym (tak na oko pó szklōnki). Jak puszczōm sok, to ślyjcie go do flaszki i zajś posujcie cukrym. I tak sie mogecie pobawić połra razy, a jak już bajecie widzieć, że tego soku je małowiela, to we jakim garcu pomiyszejcie to wszysko, co żejście ślywali z tyj krauzy do flaszkōw. Mogecie to przecedzić i wymiyszane wlołć do flaszkōw i tera zajś niech to sie trocha przegryjzie. Te owoce mogecie zjejś, mogecie sie ś nich zrobić dżymu- yno pamiyntejcie, co by nim niy futrować¹⁸ dzieci- abo uważcie sie ś nich kōmpotu. Po tym kōmpocie na pewno niy siadejcie za kerownicōm¹⁹, ale za to mogecie sie siednōńć przed telewizorym 😉 Smacznego i na zdrowie 🙂