Syrop ze sosny

Yno żeby sie sam żŏdyn¹ niy myśloł, że po Godach² sie ze choinki narychtuje taki syrop- tyn je ze modych pyndōw sosny, kere sie zbiyro we maju. Je w nim kans fetaminy C, roztomajtych olejōw eterycznych i je richtich³ dobry przi kucaniu⁴ i roztomajtych⁵ chorobach, kere sie na jejsiyń abo bez zima do dōm cisnōm. Dejcie yno pozōr⁶, kaj⁷ zbiyrocie te pyndy (nojlepsze to sōm te, kere majōm 5-12 cm), żeby to niy bōło kole drogi i żeby Wŏs we lesie niy chyciōł fejśter⁸. I niy zrywejcie za jednym razym wszyjskich ze jednyj gałyńzi, bo trza sie tyż dzielić ze strōmym⁹.

Co potrza?

wiela gramōw pyndōw, tela cukru (moge być i tyn brōnŏtny¹⁰)

jak robicie to yno dlo dorosłych, mogecie tam do kŏżdyj krauzki¹¹ dać łeżka szpyrytusu, to sie Wōm na zicher¹² to niy zepsuje

Pozbiyrejcie i umyjcie pyndy (mogecie je tyż pokrajać). Przekłodejcie je we krauzie ze cukrym. Odłōżcie to na jake 3 tydnie, przelyjcie bez gaza i wlyjcie do krauzkōw. Dzieciōm mogecie dŏwać tyn syrop ôd 6 lŏt. Dlo majerantnych¹³ mogecie dać tam tyż łeżka szpyrytusu. Niyftorzi to pasteryzujōm, ale mie by bōło szkoda tych wszyjskich skłŏdnikōw. Trzimejcie syrop we lodōwce! I na zdrowie 😉