10 lŏt do zadku we swōj gyburtstag 8 kwietnia wykupiŏłech domyna chopwkuchni.pl, a miesiōnc niyskorzij na strona wciep żech piyrszy recept. Kej tyn czas uciyk- niy wiym… Przez Chopa w kuchni poznołech osobiście dziesiōntki fajnych ludzi, we social mediach (jak to sie dzisiej mianuje)- dziesiōntki tysiyncy… Jŏ żech już je stary i bez to nojwiyncyj kontaktu Chop mŏ ze światym na Facebooku, ale te 55 tysiyncy to jednak czowieka raduje i za to Wōm dziynkuja!
Niy je żech takim typowym blogerym, kery codziynnie wciepuje nowe recepty, bo- jak wiycie- trocha sie tyż dzieje we moim artystycznym żywobyciu i fest sie z tego raduja. Niy rŏz żech sie myśloł, czy tyn Chop w kuchni mŏ jeszcze syns, przeca trzeba inwestować we domyny, serwery, kans roboty je przi nowych receptach… ale potyn patrza na Wasze kōmyntŏrze, na ludzi, kerzy sie przi kŏżdym wpisie angażujōm i se myśla, że w tym świecie połnym hejtu i brzidoty niech to bydzie takŏ nasza grupa wsparcia ôd maszkytōw 😜 Dziynkuja za dziesiōntki tysiyncy dobrych słōw i kōmyntŏrzy ❤️
I dziynkuja moji Kobiycie Ewelinie za sprawdzanie, czy aby na pewno żech postawiōł dobrze te przecinki 😉
Postarōm sie jeszcze trocha roztomajtych receptōw powynŏkwiać 😊
Dodaj komentarz