Meksykańskoł zōłza (Guacamole)

Jak chycicie¹ do rynki nachosa (piyrwy² tego sam³ niy bōło 😉 ), to dlo niego niy ma lepszego kōmrata⁴, jak guacamole. Robi sie je blank⁵ gibko⁶, ale tego smaku nigdy niy kupicie gotowego we sklepie.

Jak już je mołcie fertich⁷, to mogecie tym posmarować niyskorzi⁸ nawet sznita⁹ abo dać do smaku do miysa.

Co potrza?

1 miynke¹⁰ awokado

sok ze poły limōnki (choć mogecie dać tyż ze całyj)

poła czerwōnyj cebuli

ździebko¹¹ papryczki chili

2 łeżki liści kolyndry

sōl i pieprz

Ôbrane awokado (nojlepi je przekrołć na pó, a potyn wybrać tyn miōnższ¹² łeżkōm) wciepcie¹³ do blyndera ze inkszymi składnikōma, włōnczcie i po robocie 😉

Mogecie tyż to zrobić blynderym ryncznym. Smacznego 🙂