Mało je takich ludzi, kerzy niy lubiōm kuchni włoskyj. A jak sie pomyślymy ô Włochach, to zarołzki mōmy we gowie pizza i nudle1, a jak nudle, to jakoś zōłza2, a jak zōłza… to pesto. Te, kere sam widzicie, richtich3 dobrze smakuje, skład moł4 bez zastrzeżyń- je tam i oliwa, i syr Gran Padano, i Pecorino Romano, i orzechy pini. Z jednyj krauzy mołcie jedzynie dlo całyj familiji, ale take pesto to sie idzie posmarować na sznita, zamarynować nim miyso ( https://chopwkuchni.pl/?p=1444 ) abo narychtować ś nim szpargle5 (https://chopwkuchni.pl/?p=586 ). Mogecie sprōbować 🙂
Ocet balsamiczny je idealny do szałołtōw (https://chopwkuchni.pl/?p=171 ), a nawet do marynowania miysa. Jak kapniecie go trocha do bigosu ze cukini, to doł całymu daniu richtich fajny smak. Ôn je dużo barzi intynsywny niż tyn normalny ocet winny, słodkawy i arōmatyczny.
Suszōne tōmaty6 uwielbiōm, a te ôd Ponti wyszły richtich dobre. Te, kere idzie kupić we Biedrōnce abo Lidlu, sōm take ciapiate7 (no chyba, że treficie na włoski tydziyń i bydōm jakeś edycje limitowane), a w te ôd Ponti idzie sie wgryjś, choć niy sōm tyż twarde. A co je w tyj karauzce nojlepsze, to że tyn olyj, we ftorym to pływie, niy moł żołdnych kōnserwantōw i idzie go wykorzystać przi szałołtach i do smażynia miysa. A na śniołdanie je nojlepszo sznita ze syrkym śmiytankowym, a na to kōnsek suszōnyj tōmaty… Mogecie sprōbować 🙂
Mie sie gyszynk ôd Ponti spodoboł i sie myśla, że nawet lepi kōmu dać cojsik takego, niż nastympno blumwaza8 😉
1makaron
2sos
3naprawdę
4ma
5szparagi
6pomidory
7o konsystencji błotka
8wazon
Dodaj komentarz