Szplitry ze szinkōm (Ciasteczka na bazie ciasta półfrancuskiego z szynką ;) )

Szplitry to bōł[1] piyrszy recept,[2] co żech go sam wciep.[3] I potyn jakosik ze jednōm ze mojich ulubiōnych kōmyntatorek „Chopa w kuchni” prziszli my na pomysł szplitrōw na słōno. Trocha to za mnōm łaziōło,[4] aż tu rołz[5] we nocy, jak żech niy mōg usnōńć,[6] prziszoł[7] mi do gowy taki pomysł, co go sam trocha niżyj bajecie[8] umieli poczytać. Moja Muter mi padała,[9] że to przeca[10] niy idzie, bo szplitry muszōm być słodke, ale potyn, jak żech je piyk do audycji „Chop w kuchni” (Radio Piekary w kożdo sobota łod 10 do 12), to nawet chciała sie takego słōnego sprōbować, ale problym bōł taki, że jak żech już je tam upiyk,[11] to wszyske mi zarozki zezarli[12] 😉

Co potrza?

Ciasto:

25 dkg biołego przepresowanego syra

25 dkg masła

25 dkg mōnki
Nadziynie:
30 dkg szynki
50 dkg pieczarkōw
połra gałōnzek rozmarynu, abo 3 łeżki[13] suchego

Wciepcie tyn syr, masło i mōnka do miski i porzōndnie je ugniyćcie. Jakby sie Wōm za mocno klejōło do rynki, to dosypcie jeszcze trocha mōnki. Choć joł tyż robiōł tak, żech take klejōnce wsadziōł[14] do lodōwki, a dopiyro przed wałkowaniym taki kōnsek-co żech sie go wziōn do rozwałkowania- obkulołech[15] we mōnce. Jak już to wszystko baje wyrobione na jednolito masa, to dejcie to na godzina do lodōwki, a nojlepi na całoł noc.

Pieczarki- jak sōm gryfne- to ich nawet niy trza obiyrać. Pokrejcie je na plasterki i wciepcie na suchoł patelnia. Niby żech napisoł kans[16] tych grzibōw, ale jak łone[17] puszczōm woda, to ich łostanie[18] yno ździebko.[19] Na ta patelnia mogecie tyż wciepnōńć pokrōny[20] rozmaryn, trocha soli i pieprzu. Jak ta woda trocha odparuje, to bydōm fertich.[21]

Jak mocie sroge konski[22] tyj szinki, to jōm przekrejcie na pó,[23] a jak trocha mańsze,[24] to mogōm łostać całe. Weźcie sie taki kōnsek, na środek nałōżcie pieczarkōw i zawińcie to fajnie we rulōnik.

Rozgrzyjcie piec na 180 stopni i przigotujcie sie blacha- żeby sie te szplitry lepi ściōngało, to połōżcie na tyj blasze tyż taki papiōr do pieczynioł.

Terozki potrzebno Wōm byndzie nudelkula[25] i jeszcze trocha mōnki do podsypywania. Wyciōgcie sie mały kōnsek tego ciasta, posypcie na stole abo blacie trocha mōnki- żeby sie niy klejōło- i wałkujcie; nudelkula tyż mogecie trocha posypać tōm mąkōm.

Jak już te ciasto bydzie miało yno połra milimetrōw, to wejście nōż i potnijcie to na 8 abo 10 cm kwadraty. Do środka kołżdego kwadrata wrołźcie tyn rulōnik ze szinki ze pieczarkami i dwa boki tego ciasta złōżcie do środka. Dobrze to sklejcie, żeby Wōm sie te szplitry niy łotwarły[26] i połōżcie na blacha. Jak już jōm mołcie połno[27], to dejcie te szplitry do pieca na 20-30 min.

Jakbyjście widzieli, że już pryndzy robiōm się za bardzo brōnołtne,[28] to wyciōngejcie je pryndzy. Ale jakbyjście widzieli, że niy majōm jeszcze fajnego złotego koloru, to je jeszcze tam poczimcie.[29] Kołdży piec je trocha inkszy i to trza sie samymu sprołwdzić.[30]

Terozki już yno sie je wyciōngcie i… smacznego:)

Ps. Uważejcie, co byście sie niy poparzyli gymby 😉