Armeriter (Danie recyklingujące czerstwe bułki)

Jak żech bōł bajtlym¹, to mi Muter niyrozki to robiōła, bo przeca cojś trza bōło ze tymi starymi bōłkami zrobić, ale że to sie nazywo armeriter, to żech sie dowiedzioł dopiyro niydowno, bo piyrwy my przypiykali bōłki tōnkane² we jajku i mlyku i żodnych nazwōw to niy potrzebowało. Terozki to żech sie nawet posprawdzoł historia tego dania i pōnojś idzie podobny recept³ znojś we jednyj z nojstarszych ksiōnżek kucharskich „De re coquinaria” („Ło warzyniu”)- kaj je pedziane,⁴ że u Chopa niy moge być łaciny, a przi okazji mołcie piyrszy przekład tego tytułu na ślōnsko gołdka. We tyj ksiōnżce sōm recepty łod starożytnych Rzymianōw. Łoni tam ponojś mieli jakiś taki chlyb, co to go tōnkali we mlyku, piykli na łoleju, a potyn na wiyrch lołli⁵ miōd. I tak sie to łod nich rozeszło na całoł Europa, bo kołżdy kraj moł jakojś tego wersja. Ta nasza nazwa sie wziyna łod niymieckego Arme Ritter, co oznaczo biydnych rycerzy, a że sam nic specjalnego niy je nōm potrzebne, to dzisiaj i biydne sztudynty⁶ mogōm sie to lajstnōńć.⁷

Co potrza?

3 stare bōłki abo jak to niyftorzi gołdajōm:⁸ żymły (jak byjście mieli lynga⁹ abo wek- bo to tyż moł roztomajte¹⁰ miana,¹¹ to tyż baje dobre)

2 jajca

szklōnka mlyka

2 łeżki cukru

2 łeżki masła klarowanego

kapka łoleju¹²

pudecuker

Mogecie tyż dać:

cimt¹³– kebyjście chcieli, żeby bōły barzi¹⁴ cimtowe

miōd- jak ze 1700 lołt tymu mogli na wiyrch lołć miōd, to czamu my niy mogymy 😉

Jajca rozfyrlejcie¹⁵ (mogecie i mikserym) ze cukrym i mlykiym. Rozgrzyjcie sie na patelni łeżka masła i kapka łoleju. Pokrejcie bōłka na szajby¹⁶, porzōndnie tōnknijcie we jajcach z mlykym i wciepcie¹⁷ na patelnia. Jak sie fajnie przibrōnołci¹⁸ ze obu strōn, to wciepcie je na talyrz, posypcie pudecukrym (abo i cimtym- choć joł tam wola yno ze cukrym) i sie biercie za maszkycynie.¹⁹ Smacznego 🙂