Buchty (Kluski na parze)

Jak sie tak spōmna¹, jake bōło² moje ulubiōne jedzynie za bajtla³, to na zicher⁴ bōły to buchty u ōłmy⁵ Albiny, a dō nich zawsze bōł tyż kōmpot ze jagodōw. Moja Muter ich niy robiōła, bo padała⁶, że rołz zrobiōła i jyj niy wyszło i już jakosik tak przestała prōbować. Mie⁷ sie na te buchty zbiyrało ôd dugszego⁸ czasu, ale jak już żech je zrobiōł, to zarozki prziszły nazod⁹ roztomajte¹⁰ ôbrołzki i przipōmniały mi sie te dołwne¹¹ smaki.

Co potrza?

500 g mōnki

1 szklōnka mlyka

2 jajca

3 łeżki masła

3 dkg drożdży

łeżka cukru

ździebko¹² soli

Mōnka przesiyjcie i dejcie¹³ do jaki miski. Pośrodku¹⁴ zrōbcie dziōra, wciepcie tam pokruszōne drożdże, wciepcie cukru i zalyjcie to letnim mlykym. Przikryjcie ta miska jakim ryncznikym abo uciyraczkōm¹⁵ i ôdstołwcie¹⁶ w jake ciepłe miejsce do wyrośniyńcia (jak mołcie¹⁷ zimno we kuchni, to mogecie na chwila rozgrzołć bratruła¹⁸ i wrajzić¹⁹ tam ta miska). Ôzpuście²⁰ sie masło we jakim tygliku²¹ i niech trocha ochōdnie²². Jak już te drożdze wyrosnōm- baje²³ ich rołz²⁴ wiyncyj- to dociepcie ździebko soli, wbijcie dwa jajca, wlyjcie masło i porzōndnie to wyrōbcie. Jak by sie Wōm to mocno klejōło²⁵ do rynkōw, to mogecie jeszcze dosuć²⁶ trocha mōnki. Terozki zajś²⁷ trza to ôdstawić do wyrośniyńcia (aby pó²⁸ godziny niech postoi). Jak już tego ciasta baje rołz wiyncyj, to sie mogymy brać za kulanie buchtōw. Niy kulejcie ich za srogich, bo ône jeszcze urosnōm. Porozkłodejcie je na wysypanyj mōnkōm biyrkownicy²⁹, przikryjcie ryncznikym i niech zajś sie trocha wyrosnōm. Terozki już nōm yno ôstało³⁰ warzynie³¹. Wejście sie jaki srogi³² gornek, nalyjcie dō niego wody, a na wiyrch³³ dejcie kōnsek³⁴ gazy- pamiyntejcie, żeby go dobrze prziwiōnzać. Jak mołcie³⁵ taki gornek do warzynia na parze, to mołcie jeszcze mani³⁶ roboty. Terozki niech nōm zawrze nalōno woda, na gaza wciepcie połra buchtōw, przikryjcie i niech to sie tam aby ze 10 minut podamfuje³⁷.

Potyn już yno na talyrz i mogecie sie brać za jedzynie. Dodatki do buchtōw mogecie sie wynołkwić³⁸ roztomajte, choć mogecie tyż klasycznie sie je ôblołć masłym, posuć cukrym i zjejś ze kōmpotym ze jagodōw (jak go mołcie). Idzie dō nich zjejś i ślagzana³⁹, i banany, i roztomajte słodke zōłzy⁴⁰, ale idzie je tyż zjejś⁴¹ ze miysym, tak jak nasze kamraty⁴² ze Czech abo Poznanioki⁴³. Smacznego 🙂