Krewetki ze szpinatym (Krewetki ze szpinakiem)

Szło by pedzieć¹, że to sōm² take krewetki choby³ po grecku, bo wciep⁴ żech tam tyż trocha fety. Z krewetkōma niy ma kans⁵ roboty, a do tego jeszcze sōm zdrowe. A szpinat… dlo niyftorych⁶ bajtli⁷ to taki trocha bebok⁸ i joł tyż musza pedzieć, że jak żech go kedyjś na jakyj stołōwce dostoł, to do dzisiaj pamiyntōm, że bōł źle zrobiōny- kuchara powinna dostać szmary⁹ 😉 A styknie dać do niego trocha czosku, może soku ze citrōłny¹⁰ i już je richtich¹¹ dobry. Joł sam godōm o szpinacie- liściach, a niy tych zamrożōnych dechach, potym na talyrzu widać fajnie zblanszowane liście, a niy zielōny maras¹² 😉

Co potrza?

300 g liści szpinatu baby

400 g krewetkōw- nojlepi ôbranych

1 czerwōnoł cebula

1-2 zōmbki czosku

połra łeżek oliwy

150 g fety

keliszek biołego wina (pó wytrawnego abo wytrawnego)

Na oliwie (joł żech doł takoł ze suszōnymi prawdziwkōmi- to dopiyro fajnie wōniało¹³) we jakim wiynkszym gorku zeszklijcie cebula i dejcie¹⁴ tam tyż czosnek. Wlyjcie do tego wino i niech ône trocha ôdparuje. Dociepcie krewetki i niech sie połra minut powarzōm. Na kōniec przidzie pokruszōnoł feta, pieprz i szpinat. Jak ôn sie yno¹⁵ leko zblanszuje, to mogecie wciepować nasze danie na talyrz i brać sie za jedzynie. Do tego kōnsek¹⁶ dobryj bōłki abo chleba i … smacznego 🙂