Karminadle ze krōlikym (Kotlety mielone z królikiem)

Pōnojś¹ za starego piyrwy² sie robiōło karminadle ze krōlika i wcale sie niy dziwia, bo wtedy przi kołżdyj³ ślōnskyj chałpie bōł krōliczorz⁴. Dzisiej to pryndzyj idzie znojś⁵ bajtla, kery chowie krōlika miniaturka, niż takego krōlika, kery miyszko w krōliczorzu. I tak żech sie pomyśłoł, że trza by trocha wrōcić do tego starego receptu⁶, choć sōm żech te miyso ôd krōlika połōnczōł ze wieprzowinōm, żeby trocha prziszporować⁷ 😉

Co potrza?

500 g miysa ze krōlika

2 listki bobkowe

sōl i pieprz

2 zōmbki czosku

500 g wieprzowiny (moge być ta kula ze szinki)

sucho bōłka (abo i żymła)

łeżeczka majeranku

łeżeczka mostrichu⁸ (zynfu)

jajco

1 cebula

tarto bōłka

ôlyj do pieczynia

Tego krōlika to żech nojprzōd udusiōł we gorku- ale niy zawar⁹ żech go tam żywego, żeby sie udusiōł, yno do gorka żech wciep¹⁰ miyso, kere nojprzōd bōło przipieczōne na leko¹¹ natłuszczōnyj patelni. Zalołech to wodōm, wciepłech tam listki bobkowe, trocha soli, pieprzu i jedyn zōmbek czosku. Tak ze godzina to sie powarzōło. Potyn trza bōło ôbrać te miyso ze kojści. Bez tyn czas idzie zamoczyć bōłka we wodzie- chyba, że mołcie¹² jake ôtwarte piwo.

Wieprzowina, miyso ze krōlika i cebula żech pomelōł¹³, potyn dociep¹⁴ żech do niego wyciśniynty czosnek, jajco i prziprawy (sōl, pieprz, mostrich i majeranek), wymiyszoł i kuloł karminadle. Kołżdego ôbturłołech¹⁵ we tartyj bōłce i fajnie żech przibrōnołciōł¹⁶ na ôzgrzōnym¹⁷ ôleju. I fertich¹⁸. Smacznego 🙂