Chlyb żytni ze ziorkami (Na zakwasie)

Chlyb żytni nigdy tak fajnie niy urojśnie, jak tyn pszynny, bo moł¹ trocha inkszy² glutyn. Pōnojś³ niy buduje takich lyńcuchōw^4, jak tyn ze mōnki pszynnyj, ja mani⁵ robotny. Mōnka żytnioł niy moł tyla biołka, ale za to wiyncyj minerałōw i błōnnika. A jak do tego dociepnymi⁶ jeszcze roztomajte⁷ ziorka, to już niy bydziecie musieli jejś⁸ żołdnych tabletkōw, bo tela zdrowotnojści bajecie⁹ mieli we jednyj sznicie¹⁰ takego chleba 😉

Co potrza?

2 szklōnki mōnki żytniyj (zorta¹¹ 720; jedna szklōnka moł 120-130 g)

2 szklōnki mōnki żytniyj razowyj

10 g soli (2 łeżeczki)

1 szklōnka ciepłyj wody

poła szklōnki zakwasu (recept znodziecie sam: https://chopwkuchni.pl/?p=1510 )

szklōnka roztomajtych ziorek¹² (joł żech doł poła szklōnki słōnecznika, a reszta to bōły ziorka ze banie¹³, sezam i lyn¹⁴)

słōnecznik do posypania po wiyrchu

Piyrszy etap nojlepi zrobić na wieczōr dziyń przed pieczyniym (mogecie to tyż zrobić rano, a na wieczōr napocznōńć pieczynie). Wlyjcie do miski woda, zakwas i dejcie tam szklōnka mōnki żytniyj 720, szklōnka żytniyj razowyj, wymiyszejcie to byle jak i odstołwcie w jake ciepłe miejsce.

Na drugi dziyń/na wieczōr dejcie tam reszta mōnki, sōl i wymiyszejcie to porzōndnie jakōm warzechōm abo rynkōm. Na kōniec wmiyszejcie do tego ziorka. Narychtujcie¹⁵ sie forma na kyksōwka, dejcie dō ni papiōr do pieczynioł i wciepcie tam te ciasto. Gōra wyrōwnejcie rynkōm abo warzechōm pomoczōnōm wodōm. Odstołwcie to na 2-3 godziny w jake ciepłe miejsce. Joł łozgrzywōm¹⁶ na chwila bratruła, wyłōnczōm i wrołżōm¹⁷ tam ta forma.

Jak już wyrojśnie, to wyciōngcie ta forma ze bratruły i łozgrzyjcie jōm na 220 stopni. Jak już wrojzicie tam tyn chlyb, to bez 10 minut niech sie piecze na 220 stopni, potyn 20 minut na 200, a ôstatnie 40 minut na 180 stopni.

Jak już bydzie fajnie przibrōnołcōny¹⁸, to wyciōngcie go ze bratruły i formy (symnijcie¹⁹ tyż tyn papiōr) i niech sie tyn chlyb ochōdzi²⁰ na jaki kratce.

A potyn to już yno ździebko masła, fetu i… smacznego 🙂