Kiszōne ôgōrki (Ogórki kiszone)

Sōm¹ ludzie, kere² niy kiszōm w dōma ôgōrkōw. A joł³ ich zapytōm, czy ôni richtich⁴ niy czujōm we smaku rōżnicy miyndzy kupnymi, a takimi, kere sie ukiszōm w dōma? Ta robota je barzi⁵ ajnfachowo⁶, jak budowa cepa: wciepujesz ôgōrki do krauzy⁷, dołwosz⁸ 3 inksze⁹ składniki, zalywosz wodōm ze solōm i za połra¹⁰ dni już mogesz sie maszkycić¹¹ małosolne.

Co potrza?

ôgōrki gruntowe- niy byda sam pisoł wiela ich mołcie¹² wziōńć, bo nie wia, wiela ich zjycie, ale za mani¹³ niż 1 kg sie niy werci¹⁴ chytać; nojlepsze sōm te małe

czosnek- potrzebujecie go tak ze 2-3 zōmbki na krauza

korzyń krzōnu¹⁵– na jedna krauza potrza go yno mału kōnsek

łodyga kopru- do jednyj krauzy styknie 1 srogoł¹⁶, ale mogecie i wciś 3 mańsze

sōl- nojlepi kamiynnoł, a niy tako biołoł ze składnikami, kere zapobiegajōm zbrylaniu

Krauzy mogecie wziōńć litrowe, ale jak je Wołs¹⁷ we chałpie¹⁸ mani, to idzie i narychtować¹⁹ mańsze. Ôgōrki przed kiszyniym nojlepi na połra godzin zamoczyć we zimnyj wodzie. Potyn wciście je do krauzy, ale niy do samego wiyrchu. Wciepcie tam czosnek, kōnsek krzōnu i na samoł gōra pozginany koper. Terozki trza to zalołć wrzōncōm wodōm ze solōm- na 1 liter wody łeżka soli. Wiela narychtować wody? Na litrowoł krauza przidzie ji tak ze pó litra. Nalyjcie wody do krauzy, ale 1 cm ôd wiyrchu ôstołcie pusty, bo jak sie te ôgōrki zacznōm kisić, to wycisnōm ze krauzy tyn nadmiar wody. Zakryńćcie- niy ôpołrzcie²⁰ sie- i postołwcie na jaki desce. Za połra godzin mogecie jōm postawić we ciymniyjszym miejscu, ale dejcie pozōr²¹, bo przi kiszyniu moge ze tych krauzōw wylecieć trocha wody. Nojlepi je postawić na jaki gazecie. A za połra dni mołcie małosolne, a reszta sie ôstołwcie²² na zima. Smacznego 🙂