Wiśnia w szokoladzie (Tort wiśniowo-czekoladowy)




Na gyburtstagu1 musi być torta i niy ma sie co sam dugo na tyn tymat ôzpisywać2– no chyba, że mołcie cztyry iksze3 zorty4 ciastōw5 i za dużo by Wōm6 ôstało7 😉

Joł ôstatnio lubia eksperymyntować (nic nowego) i niyrołzki8 wyłajżōm9 z tego take maszkyty10, że aże sie sōm11 dziwia. Tu chciołech mieć pośrodku torty syrnik na zimno- nawet go widać na zdjyńciu. Na wiyrchu żech trocha poszaloł z bōmbōnami12, ale mogecie dać sam13 yno trocha ślagzany14.

Co potrza?

Biszkopt:

6 jajec

5 łeżek mōnki15

1 łeżka kakao

6 łeżek cukru

2 płaske łeżeczki proszku do pieczynia

Syrnik:

400ml syrka hōmogynizowanego- nojlepi naturalnego

330 śmiytōnki krymōwki

2 galaretki wiśniowe

Masa:

1 szokolada gorzkoł

1 syrek mascarpōne

mały dżym wiśniowy

Do postrojynia mogecie tyż sie wziōńć jakich bōmbōnōw.

Nojlepi rychtowanie16 tyj tory rozłōżcie sie na dwa dni. Przesiyjcie mōnka, kakao i proszek do pieczynia. Ubijcie biōłka ze cukrym na sztywnoł piana i pomału dodołwejcie17 żōłtka. Potyn na nojmańszych18 ôbrotach abo yno samymi łopatkami przi wyłōnczōnym mikserze wmiyszejcie mōnka, kakao i proszek. Wlyjcie to na forma do tortōw i wrojście19 do bratruły20 nagrzōnyj do 160 stopni na 40 minut. Jak już tyn biszkopt baje21 upieczōny, wyciōngcie go, przewrōćcie ta forma do gōry dnym i ściepcie ze 20-30 cm na stōł- żeby nōm te ciasto niy opadło. Biszpot niech sie tera chōdzi22.

Bierymy sie za syrnik. Ôzpuście23 dwie galaretki we 300-400 ml uwarzōnyj wody i ochōdźcie. Ubijcie śmiytōnka, niyskorzi dejcie24 dō ni syrek hōmogynizowany i ochōdzōnoł galaretka. Wrojście to do lodōwki, żeby trocha zaczło25 tynżeć.

Biszkopt przekrajcie na dwa placki, spodek wrojście nazod do formy, posmarōjcie dżymym i wylyjcie na to masa syrnikowoł. Na gōra wciepcie drugi placek biszkoptu i całojść niech idzie na połra godzin do lodōwki- nojlepi na całoł noc.

Ôzpuście szokolada we jaki misce nad gorkym ze wrzōncōm wodōm i pomiyszejcie jōm ze syrkym maskarpōne. Wyciōngcie biszkopt ze formy i posmarujcie ôd niego gōra i boki masōm szokoladowōm- nojlepi na boki nakłodejcie jōm szpricōm26, kerōm na gōrze mogecie niyskorzi zrobić tyż połra gryfnych dekoracji. Poukłołdejcie jeszcze na wiyrchu27 połra bōmbōnōw i fertich28. Smacznego 🙂

1urodzinach

2ô= ło

3inne

4rodzaje

5ō- samogłoska w wymowie między o i u

6Wam

7zostało

8czasem

9wychodzą

10smakołyki

11sam

12cukierkami

13tu

14bitej śmietany

15mąki

16przygotowywanie

17dodawajcie

18najmniejszych

19włóżcie

20piekarnika

21będzie

22studzi

23rozpuśćcie

24dajcie

25zaczęło

26szprycą

27górze

28gotowe




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*