Torta na Gody (Tort Bożonarodzeniowy)




Gody abo jak terozki1 godajōm: Boże Narodzynie, to je taki czas, kej2 sie lubiymy pomaszkycić. Apfylziny3 na świynta to bōło piyrwy4 cojś, mak tyż być musioł, bo przeca5 co to za świynta bez makōwek6. I tak żech sie pomyśloł, że na Gody narychtuja torta, kero połōnczy te dwa wspōmniynia i tak żech prziszoł na tyn leki, arōmatyczny i rozpływajōncy sie we gymbie deser. Takoł torta bydzie tyż dobro na karnawał… wtedy sie mogecie tyn biszkopt pokropić trocha sznapsym7 😉

Co potrza?

5 jajec

5 łeżek cukru

5 łeżek mōnki

łeżeczka proszku do pieczynioł

5 łeżek mielōnego maku

połra łeżek śmietōnki 30 abo 36%

200 g biołyj szokolady

500 g mascarpōne

skōrka ze jednyj apfylziny

sok ze dwōch apfylzinōw

łeżka cukru do narychtowania karmelizowanyj skōrki ze apfylziny

Ubijcie biołka ze 5 łeżkami cukru na sztywnoł piana (mogecie tam tyż dlo przełōmania smaku wciepnōńć ździebko8 soli). Potyn wmiyszejcie pomału żōłtka, 5 łeżek przesiōnyj mōnki, łeżeczka proszku do pieczynioł i mak. Wylyjcie na forma i wrojście9 do rozgrzōnyj na 160 stopni bratruły10 na 40 minut. Po upieczyniu przewrōćcie ta forma do gōry dnym i ôstołwcie11 na chwila- mogecie jōm nawet tak ze 20 cm ściepnōńć12 na stōł.

Szokolada (dodejcie dō ni połra łeżek śmietōnki) ôzpuśćcie13 we jaki misce na gorku ze wrzōncōm wodōm. Jak sie fajnie ôzpuści, to jōm zmiksujcie ze mascarpōne.

Nożykym14 do ôbiyrania ściōngcie ze wyszorowanyj apfylziny pomarańczowo skōra (bez biołego), pokrejcie we kosteczka i wciepcie z łeżkōm cukru na patelnia. Jak sie cuker ózpuści i woda odparuje, to skōrka baje15 fertich16.

Wyciście sok ze apfylzinōw, wlyjcie do gorka i ôdparujcie z niego poła17 płynu- bydzie barzi arōmatyczny.

Przekrejcie18 biszkopt na pó19, oba placki ôblyjcie sokym ze apfylziny, 1/3 masy dejcie20 miyndzy placki biszkoptu, a reszta ôzsmarujcie fajnie po wiyrchu. Na ôstatek posujcie21 na gōrze karmelizowano skōrka ze apfylziny. Terozki ôstała już yno rozpusta… smacznego 🙂

1teraz

2kiedy

3pomarańcze

4dawniej

5przecież

6ō -samogłoska w wymowie między o i u

7wódką

8trochę

9włóżcie

10piekarnika

11ô= ło, zostawcie

12zrzucić

13rozpuśćcie

14nożykiem

15będzie

16gotowe

17połowę

18przekrójcie

19pół

20dajcie

21posypcie




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*