[1]abo przynajmni joł go tak nazwoł i po prołwdzie, to mo łōn[2] wiyncy wspōlnego ze prowansjōm, niż fandzołle po bretōńsku z Bretaniōm, bo w nim sōm aby ziela, co żech sie sōm stamtōnd prziwiōz. Na niydziela nojlepi narychtować cojś lepszego i bez to taki hańdyk bōłby idealny.
Co potrza?
Pierś z hańdyka- a może i być take porzōndne udzisko
2-3 zōmbki czosku
1 cebula
15 dkg wyndzonki
25 dkg abo i wiyncyj pieczarkow
trocha masła klarowanego
klapka oliwy
śmiytōnka- nojlepi 36, ale jakby sie Wōm miało od tych kaloriōw zakryncić w łebie, to wejście sie jako chudszoł: 18stka abo 12stka
ziela prowansalske- 2 łeżki
sōl i pieprz
jak znojdzie sie tam kaj w barku biołe wino, to tyż sie moge przidać
Jakbyjście się chcieli odchudzać, to nawet tego niy czytejcie, bo sie jeszcze Wōm zawołrzy[3] i całoł dieta pódzie o kant rzici[4] roztrzajś.
Bierecie te miyso, myjecie, osuszołcie papiyrowym rancznikym i wciepujecie do miski abo i zarołz do brytfanki. Posmarujcie je leko oliwōm, wyciście na nie czosnek, posypcie zielym prowansalskim i pieprzym. Soli jeszcze niy dołwejcie, posolymy te miyso pod koniec duszynia- pōnoć bydzie barzi miynke. Jak już się to zrobi, to nojlepi dać je do lodōwki na noc, chyba że mołcie lauba[5], w kery je fajny chōdek, to mogecie je i tam łostawić.
Na drugi dziyń abo jak minie połra godzin obsmołżcie je fajnie z kołżdyj strony na klarowanym maśle i dolyjcie na koniec trocha wody- jakbyjście tam gichli tyż trocha biołego wina, to nawet bydzie jeszcze lepi (pó szklōnki na przikład). Przikryjcie i niech sie to tam na małym łogniu dusi- z godzina abo i wiyncyj moge sie to tak po mału pykać.
Terozki wciepcie na patelnia pokrono wyndzonka- w nieftorych sklepach idzie kupić już tako pokrōnoł, to styknie wciepnōńć take jedne pudełko. Jak sie już fajnie obsmołży, to wciepcie tam tyż na chwila pokrōnoł[6] cebula, tak żeby sie yno zeszklōła. I dejcie je do tego miysa, a na patelnia wciepcie trocha pokrōne pieczarki. Jak trocha z nich odparuje woda, to tyż je wciepcie do brytfanki abo gorka, kaj sie dusi te miyso. Terozki mogecie tam tyż wciepnōńć trocha soli, ale niy za kans[7], żeby po tym niy bōło larma[8], że zōłza[9] bōła za słonoł. Niech sie to tam trocha przegryzie, a jak już miyso bydzie miynke, to je wyciōngcie i pokrejcie na fajne plastry, a do garca wlyjcie śmiytōnka. Jakby ta zōłza bōła za rzodkoł, to wsypcie tam trocha mōnki. Nojlepi rozrobić jōm pryndzy w zimnyj wodzie, to nie bajecie mieli tych pierzińskich grudkōw.
Jak sie ta zōłza już tak trocha pobulgoce, to mogecie jeszcze na chwila wciepnōńć tam miyso, żeby sie te wszyske smaki fajnie połōnczōły.
I fertich.[10]
Takego hańdyka to mogecie zjejś i z klōskami, i z kartołflōma[11], nudlami[12] abo i z dobrōm bōłkōm[13].
Smacznego:)
[1] indyk
[2] samogłoska pomiędzy „o” a „u”
[3] nabierzecie ochoty
[4] ta część ciała, na której się siedzi
[5] ganek, przedsionek
[6] pokrojoną
[7] dużo
[8] awantura
[9] sos
[10] gotowe
[11] ziemniakami
[12] makaronem
[13] bułką 😉
Dodaj komentarz