Grinkōłl choby we Niymcach (Jarmuż na modłę północno-niemiecką )




We Niymcach- tam barzi1 na gōrze- majōm tako tradycja, że bez zima2 sie wybiyrajōm całōm ferajnōm3 na jedzynie tego grinkōłlu. Jo żech po prołwdzie4 nawet tego niy wiedzioł, ale jakosik żech sie połra miesiyncy tymu zgodoł ze mojōm Ciotkōm ze Bremen. Po piyrszych przimrozkach pōnoś5 tyn grinkōłl je nojlepszy i łoni tak od stycznia aże do marca sie organizujōm take fajery.6 Bajeroki7 majōm Oktōłberfest, a ci a łoni tam taki Grinkōłlfest. Kamraty8 i kōmratki9 ze roboty sie noprzōd10 idōm na zakrołpiany szpacyr,11 a potyn- jak już im trocha rzić wymarznie- idōm sie pojejś. Niy musza spōminać,12 że abstynynci niy majōm na takich imprezach leko 😉

Co potrza?

30-40 dkg grinkōłlu, co to na niego niyftorzi godajōm jarmuż 😉

1 cebula

2 wōszty13– łoni tam dołwajōm14 do tego taki wōszt, co to sie nazywo pinkel i je takōm odmianōm krupnioka, yno, że je bioły; joł żech takego niy mioł i dołech normalnego wōsztu i tyż bōło dobre

4 plastry wyndzōnki15

2 plastry schabu

trocha fetu16 abo masła klarowanego

trocha wody abo buliōnu

połra17 kartołfli18

Roztomajtych receptōw to łoni tam majōm tela, co my na panczkraut i jak zawsze mogecie sie sam tyż trocha poeksperymyntować. Nojprzōd na fecie abo maśle zeszklijcie pokrōno19 cebula, potyn dociepcie tam umyty i potargany na mańsze20 kōnski21 grinkōłl (te twarde łodygi tyż wyczajście22). Dolyjcie do tego trocha wody abo buliōnu, ale niy za dużo, żeby sie niy zrobiōło za ciapiate.23 Moja Ciotka padała,24 że łoni tam tyn wōszt warzōm osobno i dopiro na kōniec wciepujōm do garca razym ze grinkōłlym. Joł tyn wōszt podziuboł25 i razym ze wyndzonkōm wciep żech tam zaroz po tyn, jak te zielōne trocha oklapło. I tera sie to powinno 1- 1,5 godziny dusić na blank26 małym łogniu. Bez27 tyn czas mogecie sie to tyż połra razy jakōm warzechōm pomiyszać. Jak już minie godzina, to idzie28 sie uwarzić kartołfle, a pod kōniec podsmażcie trocha na patelni tyn schab i dejcie go na chwila do tego grinkōłla- pōnoś jakby sie tam za dugo dusiōł, to bōłby za suchy. Jak już wszysko mōmy fertich29 to wciepujecie to na talyrz, bierecie sie trocha mostrichu,30 jake piwo i smacznego 🙂

Mogecie tyż- jak joł z mojōm Babōm31– zrobić sie tyn grinkōłl yno ze wōsztym i wyndzōnkōm. I bez tego schabu tak my sie pojedli, że sie ruszać niy szło 😉

Grinkołl choby w Niymcach- małe

1bardziej

2w zimie

3grupą

4tak na prawdę

5podobno

6imprezy

7Bawarczycy

8koledzy

9koleżanki

10najpierw

11spacer

12przypominać

13kiełbasa

14dodają

15boczku wędzonego

16smalcu

17kilka

18ziemniaków

19pokrojoną

20mniejsze

21kawałki

22wyrzućcie

23za rzadkie

24mówiła

25ponakłuwałem

26całkiem

27tu: w międzyczasie

28można

29gotowe

30musztardy

31żoną




1 Komentarz

Dodaj komentarz

Twój adres email nie zostanie opublikowany.


*