Babka ze starego receptu (Kobieta ze… chyba się zagalopowałem w tych tłumaczeniach ;) )

Już 2 tydnie¹ tymu spominoł² żech sam³ ło staryj ksiōnżce,⁴ co mi jōm⁵ pożyczała kōmratka⁶ łod moji Mutry.⁷ Driny⁸ we tyj ksiōnżce bōła tako trocha mańszo,⁹ kero¹⁰ niy miała umszlagu¹¹ i bez to ciynżko bōło¹² pedzieć,¹³ co to za jedna. We receptach¹⁴ bōł ale wypisany proszek do pieczynioł jednyj staryj firmy, co to do dzisiej mo take same miano.¹⁵ Pomyśloł żech sie, że zrobia take małe dochodzynie, żeby sie dowiedzieć, kedy bōła wydano ta ksiōnżeczka- mo yno sześdzisiōnt połra¹⁶ zajtōw.¹⁷ Tak żech po tyn internetach lotoł, że żech doszoł do tego, że już na poczōntku XX w. dochtōr¹⁸ łod pudingōw¹⁹ i inkszych²⁰ zaczōn²¹ wydołwać broszury ze receptami. Ta moja bōła wydano we 1926 roku i gynau²² tera moł swōj 90. gyburtstag²³– tego, że je napisanoł po niymiecku i gotykym, to żejście sie chyba domyślyli ;). Tako babko to możno na srogi fajer²⁴ je za ajnfachowo,²⁵ ale jakosić trza zaczōńć, a joł żech sie pedzioł, że jak zaczynać, to łod piyrszego receptu ze ksiōnżki 😉

Co potrza?

250 g masła

200 g cukru

3- 6 jajec (joł doł 5)

500 g mōnki²⁶ pszynnyj
0,5 paczki proszku do pieczynioł (bydzie ze 2 łyżeczki)

szklōnka²⁷ mlyka

100 g koryntek (piyrwy ludzie rozróżniali rodzynki na roztomajte zorty^28– koryntki sōm małe i prawie czorne; joł żech ich niy znod i dołech sam pokrajane²⁹ suszōne śliwki- przeca Chopa by chyba pokryńciōło, keby mioł tak wszysko zrobić wedle³⁰ receptu 😉 )

100 g rodzynkōw

50 g zitronatu (abo citronatu)– jedne opakowanie ( to mie tyż zaskoczōło, a łokozało sie, że nawet dzisiaj je idzie dostać we sklepie- je to kandyzowano skōrka cytronu, a inkszo nazwa to cedrat; to je owoc starszy łod citrōłny³¹, moł rubo skōra, a łod niego ze soku robi sie kwasek cytrynowy- pōnojś³² 😉 )

skōrka ze citrōłny

50-80 g płatkōw ze mandli³³

Przi tych składnikach to żech sie zajś rozpisōł, ale niy bōjcie sie, niy byda Wōm robiōł klasōwek z tego, co żejście sam zapamiyntali 😉

Piec sie rozgrzyjcie na 160 stopni- w tych starych receptach to przeca niy ma podanyj tymperatury, yno piszōm: dejcie do dobrze abo średnio nagrzōnego pieca; ale co to, Chop sie niy do rady?

Masło utrzyć- joł tam robia to mikserym, bo mie sie niy chce kryńcić warzechōm we misce 😉 Dodejcie tam cuker, żōłtka i dobrze rozmiyszejcie. Potyn przidzie mōnka, proszek i mlyko, a jak łone sie fajnie połōnczōm, to wciepcie³⁴ bakalie i ubito piana ze biōłek.

Na dōł łokrōngłyj formy posypcie mandle, na to przidzie ciasto i rajn³⁵ do pieca na 75 abo i 90 minut- wszysko zależy łod pieca i jak bajecie widzieć, że sie za mocno brōnołci,³⁶ to wyciōngejcie. Łoni piyrwy piykli to 1,5 godziny, a dzisiej przy tyj technice to wszysko idzie gibciyj.³⁷ Łostało mi Wōm życzyć yno jeszcze smacznego 🙂