Karminadle jak dlo grołfa (Kotleciki hrabiowskie)

Łostatnio żech robiōł1 kans2 ajerkōniaku i inkszych kakaōwkōw, a jak byjście przesztudiyrowali3 te recepty,4 to zarozki byjście sie pomyśleli, co tyn borołk5 robi z tymi wszyskimi biołkami- przeca porzōndny Ślōnzok niy wyciepnie6 jedzynia, a świniōw ani inkszyj zwierzyny niy mōm. To żech sie pomyśloł, że trza tym wyfutrować dōmownikōw- bōłech wtedy u Teściowyj, a wiadomo, że na teściowych sie robi nojlepsze eksperymynty 😉 A jak Teściowo pedziała jeszcze, że bōło dobre, to musi być to na zicher7 udany eksperymynt 🙂

Co potrza?

12 biołek

500 g mielonego miysa- jo miołech8 ze hańdyka9

150- 200 g tartego żōłtego syra

1 cebula

1-2 zōmbki czosku

1 łeżeczka musztardy

2 łeżki zielōw prowansalskich

4 łeżki kartofylmyjlu10

4 łeżki tartyj bōłki

sōl -nojmani jedna płaskoł łeżeczka

pieprz abo jak to dołwni gołdali11: korzynie

łolyj12 do pieczynia

 

Ubijcie sie te biōłka ze solōm na piana i dejcie dō ni13 potyn kartofylmyjl. We drugi misce połōnczcie sie mielōne miyso, syr, prziprawy, tarto bōłka, pokrōno cebula, wyciśniynty czosnek i musztarda- mogecie to tyż zrobić mikserym, co sie mołcie trołpić14 miyszaniym. Tera dokłodejcie do tyj miyszanki ubito piana i na małych obrotach miksujcie, aże sie wszysko połōnczy. To niy bydōm take richtig15 karminadle, co to sie je łobtoczo16 we tartyj bōłce, bo łone sōm na to trocha za miynke i bez to na rozgrzōno patelnia dołwo sie je łeżkōm abo warzechōm, trocha jak placki. Jak sie fajnie przibrōnołcōm17 ze jednyj i drugi strōny, to mogecie siadać do stoła. Ku tymu18 mogecie sie zjejś i uwarzōne kartołfle,19 i jako kasza, ale i- jak to czynsto sie u Chopa zdarzo- jako dobro bōłka abo chlyb. A szałołt to sam przipasuje tyż kołżdy- no, może tyn ze rybōm niy, ale inksze już ja 😉

Smacznego 🙂

Karminadle choby do grołfa- małe

 

 

1ō– samogłoska w wymowie między o i u

2dużo

3przestudiowali

4przepisy

5biedak

6wyrzuci

7na pewno

8miałem

9indyka

10mąki ziemniaczanej

11dawniej mówili

12olej

13niej

14męczyć

15naprawdę

16obtacza

17przypieką

18do tego

19ziemniaki

Post Author: klaudiuszkaufmann

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *