Babeczki markwiowo-żytnie ze figōm (Muffiny fitness)

Te dochtory1 marudzōm, że jymy za dużo biołyj mōnki i bez to żech sie pomyśłoł, że trza by bōło tyż sam cojś upiyc do zdrowotnojści- jak w ogóle idzie pedzieć, że słodkojści sōm zdrowe. Mōmy sam fetaminy2 ze markwi, mōnka żytnio razowo i do tego żech jeszcze doł cojsik takego, jak zarodki pszynne- normalnie jak rychtujōm3 ze pszynicy biołoł mōnka, to je wyciepujōm, a łone majōm wiyncyj solōw mineralnych i fetaminōw, jak4 całe ziorko. To trocha tak, keby jako kobiyta sie kupioła nowo kecka5, łostawiōła sie w dōma z ni yno pasek, a ta reszta by wyciepła. Bez to trza pamiyntać, żeby jejś6 tyż trocha tych niyprzetworzōnych czyńści zboża. Niy bōjcie sie, że tam driny7 sōm yno same dziwności, bo trocha szokolady tyż tam je- to przeca mo być do ludzi, a niy do cudokōw.

Co potrza?

4 jajca

1 szokolada

4 wiynksze markwie8

1 szklōnka mōnki żytni

1 szklonka zarodkōw pszynnych (kebyjście ich niy mogli znojś, to mogecie dać pszynnyj razowyj abo- no trudno- normalnyj pszynnyj)

0,5 – 1 szklōnki brōnołtnego cukru (zależy łod tego, jak mocno chcecie je mieć fitness)

1,5 łeżeczki proszku do pieczynioł

bojtlik9 figōw

ździebko10 chili

ździebko soli

4-6 ziorka ziela angelskego (roztrzaskane we moździerzu)

2 łeżki oliwy

2 łeżki masła

Szokolada rozpuście w jakim gorczku abo misce nad wrzōncōm wodōm. Wciepcie tam tyż te 2 łeżki masła. Jajca zmiksujcie ze cukrym. Niyskorzi11 dejcie tam mōnka, zarodki, rozpuszczōno szokolada, oliwa, potarte markwie, prziprawy i wszysko dobrze wymiyszejcie. Rozgrzyjcie sie piec na 180 stopni. Przigotujcie sie forymki na muffiny- nojlepi take mańsze. Do kołżdyj dejcie łeżka ciasta (żeby wiynksze pó12 forymki bōło połne- ja, wiym, że połōwki zawsze sōm równe, ale przeca i tak wszyscy wiycie, o co sam13 idzie) i wciście po pó figi. Potyn wrojście te babeczki do pieca na 20 minut, żeby sie tak fajnie przibrōnołciōły14. Niyskorzi niech sie leko ochōdzōm i… na zdrowie 🙂

Babeczki żytnie ze figom- małe

1lekarze

2witaminy

3przygotowują

4niż

5sukienkę

6jeść

7w środku

8marchwi

9opakowanie

10szczyptę

11później

12połowa

13tutaj

14przypiekły

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *