Grillowane szpargle ze pesto (Zielono mi ze szparagami)

Pesto, jak chyba wszyjscy wiycie, prziciōngło1 dō nołs2 ze Włoch. We sklepie sie je idzie kupić we małyj krauzce3, ale jak fto sie rołz sprōbuje je zrobić sōm, to na te kupne niy bydzie chcioł ani wejrzeć. Robi sie je gibko4, a potyn idzie trzimać we lodōwce i zjejś sie je ze nudlami5 abo i na sznicie6 chleba. Italioki7 dołwajōm do tego orzeszki piniowe i jak niy mołcie co robić ze piniyndzmi, to tyż sie je mogecie kupić. Joł dołwōm słōnecznik, je podobny we smaku i 10 razy tōńszy. Sam żech jeszcze wciep trocha kolyndry i smak wyszoł idealny.

Co potrza?

1 pynczek szparglu

Pesto:

1 srogi8 pynczek bazylii

połra gałōnzek kolyndry

2 zōmbki czosku

3 łeżki prazōnego słōnecznika

30-40 g parmezanu

1/4 szklōnki oliwy

2/4 szklōnki łoleju słōnecznikowego abo rzepakowego

sōl i pieprz

Joł niy robia tego yno ze samōm oliwōm, bo łona moł aże za łostry smak, a łolyj to wszysko trocha łagodzi. Pamiyntejcie, że nojlepszoł oliwa je ta extra virgin, bo je ze piyrszego tłoczynia i to jeszcze na chōdno9.

Szpargle umyjcie, kołżdego sie wejście do rynkōw, wygnijcie go jak łuk i jak pynknie, to ta gōrnoł czyńść je do jedzynia, a dolnoł do wyciepniyńcia. Rozgrzyjcie sie patelnia do grillowanioł abo i grilla, wciepcie tam szpargle i niech sie tam pomału bez 10-15 min przipiykajōm- pamiyntejcie, że trza je tyż połra razy przewrōcić na drugoł zajta10.

Wszyske składniki pesto wciepcie do blyndera- ze bazylii yno same listki, a kolyndra we całojści- i go włōnczcie… i fertich11. Trza pedzieć, że żołdnyj filozofiji to sam12 niy ma.

Jak szpargle bydōm miynke, to je dejcie na talyrz, łoblyjcie pesto i smacznego 🙂

Jak Wōm tego pesto łostanie, to dejcie je do lodōwki, do jaki krauzki, a na wiyrch nalyjcie jeszcze kapka oliwy i to tam moge tak trocha sie poczekać na drugi rołz 😉

Szpargle ze pesto-małe

1przybyło

2nas

3słoiku

4szybko

5makaronem

6kromce

7Włosi

8duży

9zimno

10stronę

11gotowe

12tutaj

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *