Szałołt ze granatym (Wybuchowa sałatka ;) )

Niyftorym sie bez lato tak miyrznie1, że potrzebujōm mocniyjszych wrażyń: skokajōm na tym gumowym powrozie2, nurkujōm po jakich starych potopiōnych szifach3… abo sie robiōm szałołt ze granatym 😉 Joł wiym, że niyftore chopy to zarozki chcieliby go narychtować do swoji teściowyj, ale musza Wołs zmartwić- tym granatym to sie mogecie, co najwyżyj, zmarasić4 koszula 😉

Co potrza?

gorść5 rukoli (gorść łod chopa, a niy łod bajtla6 abo idzie dać take całe kupiōne opakowanie)

gorść roszpōnki

połra łeżek łobranego słōnecznika

trocha mani nasiōn sezamu

2-4 tōmaty7

150-200 syrka feta

jedne opakowanie kiełkōw ze brokułōw

I tak tak styknie8 do 4 ludzi.

Zōłza:

łeżka9 miodu
łeżka łoctu balsamicznego
3 łeżki oliwy

3 łeżki oleju- moge być słōnecznikowy

sōl i pieprz

łeżka zōłzy ze granata- idzie cojsik takego kupić we sklepach oriyntalnych, ale ni łōmcie10 sie tym gowy, jak niy ma, to niy ma 😉

mogecie tyż dac łeżeczka musztardy

Składniki zōłzy wciepcie do jaki miseczki, wymiyszejcie i fertich. Do jaki wiynkszyj michy wciepcie roszpōnka, kiełki i rukola- nojlepi umyte 😉 Słōnecznik i sezam dejcie na suchoł patelnia i trocha uprażcie, ale niy przibrōnołćcie11 za kans12. Pōmidorōm seblyczcie13 skōra i pokrejcie we kosteczka, tak samo i ta feta. Dociepcie razym ze ziorkami do tyj srogi michy, wymiyszejcie ze zōłzōm i sie biercie za jedzynie. Do grilla bydzie tyn szałołt idealny… smacznego 🙂

Szałołt ze granatym-małe

1nudzi

2lina

3statkach

4pobrudzić

5garść

6dziecka

7pomidory

8wystarczy

9 łyżka

10przejmujcie

11przysmażyć

12za dużo

13obierzcie

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *