Francuski Ajntopf (Ratatouille/Ratatuj)

Tym daniym to żech sie piyrszy rołz zainteresowoł, jak żech łoglōndoł tako bajka, we ftoryj małe zwierzynta- co to normalnie ich niy lubiymy, ale we bajkach nawet ja- robiōły we restauracji za kuchorzy i narychtowały jednymu ważnymu chopowi właśnie take danie. Potyn żech pojechoł do Prowansji, a to właśnie stamtōnd pochodzi te danie i żech sie pomyśloł, że trza by sam na miejscu sie szczelić takego prawdziwego ratatuja. Narychtowoł żech go cały srogi1 gar i wszysko my tam wmōciyli2. Niy ma sam nic skōmplikowanego, a prziszpanować ze nazwōm przi bezuchu3 idzie 😉

Co potrza?

2 cukinie
2 bakłażany
2 papryki
2 cebule
2-3 zōmbki czosku
6 tōmatōw4

12 łeżek5 oliwy
4 łeżki łoctu
6
1 łeżka cukru

Prziprawy:
jak niy mołcie ziōł we łogrōdku ani dōniczce, to mogecie wciepnōńć 4 łeżki zielōw prowansalskich, ale nojlepi jakbyjście sie do tego dociepli tyż trocha świyżyj bazylii abo tymianku, oregano, majeranku, szałwi, gałōnzka rozmarynu abo i trocha miynty 🙂

Bakłażana- tymu to trza by wymyślić jake ślōnsko miano7– pokrejcie8 ze skōrōm we kostka, posypcie solōm i łodstołwcie,9 żeby puściōł sok i bez10 to niy bōł gorzki. Tōmaty łobiercie ze skōry. Do gorka wlyjcie oliwa, wciepcie wyciśniynty czosnek, pokrōno cebula i nich sie tam łona11 fajnie zeszkli. Bakłażana opukejcie12 i osuszcie. Pokrejcie we kostka cukinia, papryka, tōmaty i wszyske te warzywa (razym ze bakłażanym) wciepcie ze prziprawōma do gorka. Na sōm poczōntek papryka, bo je nojtwardszo, a potyn nastympne13 i niech sie to tera fajnie podusi, aże zmiynknie. Na koniec wlyjcie tam łocet, niech sie to połra razy bluknie14 i fertich.15
Takigo ratatuja abo francuski ajntopf
16, bo to przeca wszysko we jednym gorku sie warzi, idzie sie zjejś samego, ze jakim wōsztym abo i bōłkom… smacznego 🙂

Ratatouille-małe

1duży

2zjedliśmy

3goście

4 pomidorów

5 łyżek

6 octu

7 nazwę

8 pokrójcie

9 odstawcie

10 przez

11ona

12 opłuczcie

13 następne

14 zabulgocze

15 gotowe

16danie jednogarnkowe

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *