Hiszpańskoł smażōnka (Tortilla de patatas)

Tak po prołwdzie, to niy je takoł richtig1 smażōnka, yno ōmlet, ale jakosik mi sie ta nazwa barzi spodobała. Żeby bōło jeszcze ciekawiyj, to żech sie te hiszpańske danie nauczōł robić we Francji. Tortilla [czyt.: tortija] ze kartołflōma2 je klasycznoł, bo rajn3 idzie tyż wciepōńć i wōszt4, i inksze warzywa. Robi sie to trocha dużyj5 niż smażōnka, ale za to mogecie mieć potyn Hiszpania na talyrzu.

Co potrza?

0,5 kg kartołfli

1 cebula

1/4 szklōnki oliwy

8-10 jajec (nojlepi łod tych szczyńśliwych kurōw)

Kartołfle łobiercie i pokrejcie na plasterki. Na patelnia wlyjcie oliwa, wciepcie kartołfle i podpiykejcie aż bydōm miynke. Pod kōniec dejcie tam tyż pokrōno we kosteczka cebula.

Jajca ubijcie mikserym w jaki srogi misce, potyn wciepcie tam te kartołfle ze cebylōm, wymiyszejcie i wszysko nazōd wlyjcie na patelnia. I tera niech sie to tak na małym łogniu ze 15-20 minut piecze. Potyn trza by jōm przewrōcić na drugoł zajta.6 Połōżcie na gōrze patelni srogi7 talyrz, przewrōćcie patelnia do gōry tak, żeby na talyrz śleciała naszoł tortilla, a potyn z tego talyrza ściepnijcie jōm niyupieczōnōm zajtōm na patelnia. Tera zajś niech sie to tak ze 15-20 min podpiyko- sprowdzejcie, żeby sie niy przipołlōło. I fertich8. Takoł tortilla idzie jejś i na ciepło, i na zimno. Na zimno łoni jōm we Hiszpani jedzōm ze majōnezym. Tortilla to je jedyn ze składnikōw tapas- takich hiszpańskich przegryzek. Jak byjście chcieli, żeby Wōm sie gojście9 niy łobrzarli, to mogecie im dać na stōł a to pokrōno na kōnski tortilla, a to trocha wōsztu, jako oliwka, kōnsek syra… i bydōm mieli richtig hiszpańske tapas 😉

Tortilla-małe

1prawdziwa

2ziemniakami

3do środka

4kiełbasa

5dłużej

6stronę

7duży

8gotowe

9goście

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*