Ruske ajerkuchy (Bliny)

Jak czowiek czyto ruske ksiōnżki i patrzy na te ichniyjsze filmy, to ôni1 tam co chwila jōm2 bliny. I sie tak potyn myślymy, co to je za pierziństwo, a tak po prołwdzie3, to to sōm4 take normalne ajerkuchy5, yno, że na drożdżach i ze mōnkōm gryczanōm. Robi sie je dojś6 szybko-yno trocha wiyncyj czasu potrza7 na to, aże te drożdże zacznōm robić, ale wtedy przeca sie mogecie wlyjś8 na fejsbuka 😉

Co potrza?

połno9 szklōnka mōnki gryczanyj

wiynksze pó10 szklōnki mōnki pszynny

niycałoł szklōnka wody

szklōnka mlyka

2 dkg drożdży

1 jajco

50 g ôzpuszczōnego11 masła

trocha soli

łeżeczka cukru

masło klarowane (do pieczynia)

Na wiyrch:

gynsto12 śmiytōnka13

wyndzōny łosoś

kawior

Na suchoł patelnia wciepcie14 mōnka gryczanoł i jōm trocha przipiyccie- ale niy na miał15 😉 Potyn pomiyszejcie jōm ze wodōm we misce i dosujcie do tego mōnki pszynny. Mlyko podgrzyjcie leko we gorczku16, rozpuście tam drożdże i cuker. We misce, kaj sōm mōnki, na pośrodku zrōbcie dziura i wlyjcie tam mlyko ze dodatkami. Ôstołwcie17 to pod jakim ryncznikym we ciepłym miejscu na 20 minut.

Potyn dociepcie18 tam jajco, ôzpuszczōne masło i fajnie to wymiksujcie. Tera zajś19 by trza to ôdstawić na aby 0,5 godziny (we Rusyji majōm wiyncyj czasu, to mogōm to tak czimać20 i 3 godziny 😉 ). Niyskorzi rozgrzyjcie patelnia, dejcie na nia trocha masła klarowanego i piyczcie za kołżdym razym 4 niy za sroge21 placki.

Na wiyrch takego ruskego ajerkucha idzie wciepnōńć byle co, te nojbarzi klasyczne sōm ze śmiytōnkōm i kawiorym abo łososiym. Choć jak ludzie mieli tam biyda, to byli radzi, jak sie takego blina zjedli i ze ôzpuszczōnym masłym. Smacznego!

Ruske ajerkuchy-małe

1ô = ło

2jedzą

3naprawdę

4są, ō- samogłoska w wymowie między o i u

5naleśniki

6dość

7potrzeba

8wejść

9pełna

10pół

11rozpuszczonego

12gęsta

13śmietana

14wrzućcie

15o to trzeba dokładnie pytać w sklepach z materiałami opałowymi 😉

16garnuszku

17zostawcie

18dorzućcie

19znów

20trzymać

21duże

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *