Galert świńsko-drobiowy (Galareta)

Ostatnio robiōłech1 golōnka we piwie, a że szkoda mi bōło2 tego wywaru, co to jeszcze- jak żech go wrajziōł3 do lodōwki- tak sie fajnie zsiednōł, że nic, yno trza bōło ś niego zrobić galert. Golōnki bōły już zezarte4, a jakeś miyso trza by bōło dać rajn5. A jak żech sie swoji Baby6 zapytoł, czy chce tam mieć świnia czy kura, to padło na kura i tak żech prziszoł na galert świńsko-drobiowy 🙂

Podstawōm do niego je recept na golōnka: http://chopwkuchni.pl/?p=728 , a jak już mołcie je fertich7, to sie bierymy dali za robota.

 

Co potrza?

500 g kurczaka- joł doł filety ze podudzi

2 markwie8

gorść zielōnego mrożōnego groszku

jedne uwarzōne jajco

 

Tyn wywar po golōnkach nojlepi nojprzōd9 przecedzić. Potyn wciepcie tam miyso ze kurczaka, marchew, groszek i warzcie10, aż marchew bydzie miynkoł11. Tera pokrejcie12 miyso i marchew, ôbiercie i pokrejcie jajco. Niyskorzi13 fajnie sie to wszysko poukłołdejcie we jaki misce abo azjetkach14, zalyjcie wywarym i dejcie15 do lodōwki. Jak stwardnie, to sie mogecie brać za jedzynie. Tyn galert niy bydzie aż tak twardy, żebyjście go mōgli krajać nożym, a jakbyjście aż taki chcieli mieć, to musicie tam tyż jeszcze ôzpuścić16 łeżeczka żelatyny. Joł robiōł bez i bōło richtich17 dobre. Smacznego 🙂

1robiłem, ō- samogłoska w wymowie między o i u

2było

3włożyłem

4zjedzone

5do środka

6żony

7gotowe

8marchwie

9najpierw

10gotujcie

11miękka

12pokójcie

13później

14salaterkach

15włóżcie

16rozpuścić

17naprawdę

Post Author: klaudiuszkaufmann

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *