Golōnka ze piwym 2 (Golonka piwna 2)

Jedna kōmratka¹ miała u mie zaległe golōnki, a jak już miała prziś², to żech trocha zaczōn³ eksperymyntować. Miały być rychtowane⁴ we niski tymperaturze, ale że we gorku bōła⁵ straszno cizba⁶, to trza bōło improwizować i uwarzić je barzi tradycyjnie. Do tych golōnek dlo ciyrpliwych jeszcze kedy⁷ przida, ale dziynki tym mioł żech potyn fajny galert⁸ 😉

Co potrza?

2-3 kg golōnki (nojlepi tyj ze zadku)

0,5 litra piwa

0,5 litra wody

połra liści bobkowych⁹

połra ziorek¹⁰ ziela angelskigo

połra ziorek jałowca

2 zōmbki czosku

sōl i pieprz

Dziyń naprzōd¹¹ wrojście¹² te golōnki do gorka, wciepcie tam prziprawy (czosnek moge być nawet we całojści) i zalyjcie wszyjsko piwym i wodōm. Na drugi dziyń dejcie¹³ tyn gornek na piec i niech sie to na małym ôgniu¹⁴ warzi- nawet i 3 godziny. Potyn wyciōngcie¹⁵ golōnki, przełōżcie na blacha i wrojście do bratruły¹⁶ na funkcja grill na nojwyższy poziom (jak ji¹⁷ niy mołcie¹⁸, to rozgrzyjcie bratruła na 250 stopni) na 20-30 minut, tak żeby sie fajnie przibrōnołciōły¹⁹. Tera już yno ôstało je fajnie pokrajać i… smacznego!