Beza ze mango (Po polsku nic innego nie wymyślę)

Poczamu1 lubia mango? Bo je fajnie arōmatyczne2, bo żech go za bajtla3 niy znoł, bo niy je za słodke, … no i całe szczyńście4 idzie dobre mango kupić we Polsce. Choć te ludzie, kerym5 mango rośnie na zygrōdce6, jak widzōm te owoce, kere idzie kupić u nołs7 we sklepie , to sie śmiejōm, że takich małych jeszcze niy widzieli. Ale jakbyjście niy chcieli aż tak eksperymyntować, to sie mogecie dać do tyj bezy blank8 ajnfachowe9 truskawki 😉 A beza? Niy je za suchoł10, ze wiyrchu11 chrupiōncoł, driny12 miynkoł13… aże ôd tego pisania leci mi ślinka…

Co potrza?

Beza

8 biōłek14

2 szklōnki cukru

ździebko15 soli

2 łeżki soku ze citrōłny16 abo ôctu

Kryjma17

1 syrek mascarpōne

300-330 śmietōnki

2 łeżeczki żelantyny18

1 mango

Biōłka ubijcie ze cukrym i solōm na sztywnoł piana, a na sōm kōniec wmiyszejcie tam 2 łeżki soku ze citrōłny abo ôctu. Na blasze- jednyj abo dwōch, zależy jake sroge majōm być te bezy- narysujcie sie na papiōrze do pieczynioł kōłka i potyn nałōżcie na nie ubitoł piana. Na tyn kōnsek, kery bydzie na gōrze, mogecie tyż czyńść piany wycisnōńć szpricōm19, co by nōm to gryfniyj 20wyglōndało.

Bratruła21 sie rozgrzyjcie na 120 stopni i wrojście22 dō ni te bezy. Jak minie pó godziny, to mogecie zmniyjszyć tymperatura na 100 stopni i niech sie óne tam siedzōm tak ze 1,5- 2 godziny. A potyn dejcie23 tyj bezie chwila na ochōdzynie24.

Tera sie bierymy za kryjma. Rozmiyszejcie sie we poru łeżkach uwarzōnyj25 wody dwie łeżeczki żelantyny. Mango ôbiercie i pokrajejcie26 na małe kōnski27. Śmiytōnka ubijcie, potyn pomału28 dodowejcie29 dō ni mascarpōne (niy miszejcie na za mocnych ôbrotach), a na kōniec wciepcie30 pokrajane mango i żelantyna.

Na dolny placek bezy dejcie kryjma, na wiyrch wrojście31 ta drugoł czyńść, cołojść dejcie na chwila do lodōwki i… smacznego 🙂

1dlaczego

2ō- samogłoska w wymowie między o i u

3w dzieciństwie

4szczęście

5którym

6ogródku

7nas

8całkiem

9zwykłe

10sucha

11z góry

12w środku

13miękka

14białek

15szczypta

16cytryny

17krem

18żelatyny

19szpryca, rożek do dekorowania

20ładniej

21piekarnik

22włóżcie

23dajcie

24ostudzenie

25ugotowanej

26pokrójcie

27kawałki

28powoli

29dodawajcie

30wrzućcie

31włóżcie

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *