Słodkoł tarta ze iberaszōngym (Tarta z niespodzianką)

Niy czekejcie, że tam bydzie1 szło znojś2 kupōn3 na telewizor abo złoty pieszczōnek4, choć jak sami cojsik takego tam skludzicie5, to sie bydzie Wasz byzuch6 radowoł. Jo sie zarozki7 na poczōntku prziznōm8, że jak żech rychtowoł9 te tarletki (małe tarty), to bōło10 ciepło, a do tego jeszcze mieli przijś gojście i żeby my sie niy uwarzyli11 we miyszkaniu, to żech sie kupiōł gotowe spodki do tarletkōw. Kebych12 mioł to robić sōm, to bych zrobiōł jedna srogoł13 tarta, bo za kans14 smolynia15 bych mioł z tymi małymi pyrtkami.

Co to za ibaraszōng? To bydōm trzi warstwy rozpusty: piyrszoł to szokolada ze mascarpōne, potym przidzie kōnfitura ze aprikołzōw16, a na wiyrch kokosowy pudding. Niy je to za słodke, wartko sie robi, a potyn sie idzie rozkoszować fajnymi maszkytami17. A jeszcze jak aprikołzy bydōm kwaskowate, to słodke bydzie fajnie przełōmane.

Co potrza?

Spodek:

200 g mōnki18 pszynnyj

125 g masła

3 żōłtka (biołka sie zamrojście- przidajōm19 sie kedy idziyj na beza abo makrōłny)

3 łeżki cukru

ździebko20 soli

Warstwy:

250 g mascarpōne

100 g szokolady deserowyj (gorzkyj)

20 dkg aprikołzōw

400 ml mlyka kokosowego

pudding waniliowy

Kebyście chcieli sie zrobić ta wersja dlo barzi robotnych, to rozgrzyjcie bratruła21 na 200 stopni. Wszyjske składniki spodka wciepcie22 do jaki miski i wyrōbcie. Niyskorzi niy bydymy tego dołwać do żołdnyj23 lodōwki na połra godzin, yno zaroz wyklejymy tym forma na tarta. Kebyjście chcieli, to mogecie tyż te ciasto sie rozwałkować miyndzy dwōma papiōrōma do pieczynioł, a potyn yno przeciepnōńć je do formy. Przed pieczyniym mogecie je tyż trocha podzióbać widołkōm24. Wrojście25 tyn spodek do pieca na 20-25 minut, żeby sie fajnie na złoto przibrōnołciōł26. Jak już baje upieczōny, to niech sie ochōdzi i mogecie dołwać do niego nasze warstwy.

Jak mołcie kupiōne gotowe tarletki, to poła27 roboty już za Wami i mogecie sie zarozki brać za rychtowanie piyrszyj warstwy.

Ôzpuśćcie28 szokolada we jaki misce nad gorkym ze wrzōntkym, a potyn wymiyszejcie ze syrkym mascarpōne i mogecie kłajś29 na tarta/ tarletki.

Aprikołzy wrojście na chwila do wrzōntku, ôbiercie30 im skōry, wyciepcie31 pestki i zblyndujcie. Potyn przelyjcie ta masa na patelnia i niech sie ôdparuje (jak aprikōłzy bydōm za kwajśne, to mogecie dociepnōńć do tego trocha cukru). Jak już ta kōnfitura bydzie fajnie gynstoł, to rozsmarujcie jōm na warstwie ze szokoladōm.

Terozki ôstoł32 już nōm33 yno34 pudding. Uwarzcie35 we gorku mlyko kokosowe. Do jaki szolki36 wlyjcie 150 ml zimnyj wody, ôzpuśćcie tam pudding i dejcie do warzōncego37 sie mlyka. Miyszejcie, aż to wszyjsko cuzamyn38 zawrze39. Przelyjcie tyn pudding na wiyrch tarty i za chwila mogecie Wasz byzuch wołać na kafyj40. Smacznego 🙂

1będzie

2znaleźć

3ō- samogłoska w wymowie między o i u

4pierścionek

5schowacie

6goście

7zaraz

8przyznam

9przygotowywał

10było

11ugotowali

12gdybym

13dużą

14dużo

15pracy

16moreli

17słodyczami

18mąki

19przydadzą

20trochę

21piekarnik

22wrzućcie

23żadnej

24widelcem

25włóżcie

26przyrumienił

27połowa

28rozpuśćcie

29kłaść

30obierzcie

31wyrzućcie

32został

33nam

34tylko

35zagotujcie

36szklanki, kubka

37gotującego się

38razem

39nie zagotuje się

40kawę

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*