Jochanki we biołyj szokoladzie (Torcik porzeczkowy)

Niy dojś, że robi sie to blank¹ ajnfachowo², to jeszcze niy bydzie za kans³ takich, kerym⁴ to niy posmakuje- chyba, że lubiōm yno torciki ze śledziym 😉

Słodke, choć niy za kans, a do tego jeszcze smak fajnie przełōmany kwaśnawōm czerwōnōm jagōdkōm⁵.

Co potrza?

6 jajec

ździebko⁶ soli

6 łeżek mōnki pszynnyj

6 łeżek cukru

łeżeczka proszku do pieczynia

200 g biołyj szokolady

500 g mascarpōne

pólitrowy gorczek jochanek⁷ abo jak by niyftorzi⁸ pedzieli⁹ czerwōnych jagōdek

Nojprzōd biszkopt. Ubijcie biołka ze cukrym i ździebkym soli. Do tego niyskorzi wmiyszejecie pomału¹⁰ żōłtka i przesiōno bez sitko mōnka i proszek do pieczynioł. Przełōżcie ta masa do ôkrōngłyj formy i wrojście¹¹ na 40 min do bratruły¹² rozgrzōnyj na 160 stopni. Jak tyn biszkopt wyciōngniecie, to przewrōćcie go na jaki desce do gōry dnym i niech tak sie chwila pochōdzi¹³.

Terozki ôzpuście¹⁴ szokolada we kōmpieli wodnyj (miska na gorku ze wrzōncōm wodōm) i wymiyszejcie jōm ze mascarpōne.

Przekrejcie¹⁵ biszkopt, posmarujcie jedna czyńść masōm ze szokoladōm i powciepujcie na to poła jochanek. Terozki dejcie na wiyrch¹⁶ drugi placek biszkoptu, całojść fajnie posmarujcie kryjmōm, a gōra postrōjcie¹⁷ jochankami. Ajnfachowe? Na zicher¹⁸. Teroski¹⁹ yno na chwila do lodōwki i… smacznego 🙂