Citromisu (Eksperymentalne podejście do zagadnienia zwanego tiramisu)

Połōnczynie citrōłny¹ i bazylii je tak dobre, że już ôd² dugszego czasu nosiōło mie, żeby wykorzystać je do jakego deseru. Ôstatnio bōło u mie na tapecie tiramisu i jak żech je jołd, to mie oświyciōło… 😉

Co potrza?

4 jajca (4 żōłtka i 2 białka)

poła szklōnki cukru

500 g mascarpōne

200 g podłużnych biszkoptōw (jeden mańszy pakyt)

2 citrōłny

gorść³ liści bazylii

2-3 łeżki limoncello abo cytrynōwki (abo kōniaku)

poła szklōnki czornego mocnego tyju⁴– jo go narychtowoł ze 2 torebek

Ôberznijcie⁵ skōra ze citrōłny, ale dejcie pozōr⁶, żeby to bōło yno te żōłte (joł żech ôbiyraczkōm ściōngoł rube pasy wzdłuż, a potyn żech na desce je ciōł na take blank⁷ ciynke jak nudle⁸). Wrojście⁹ do gorka, nasujcie¹⁰ tam 2 łeżki cukru, nalyjcie trocha wody i niech sie to tak aby ze 10 minut pomału¹¹ powarzi. Sok ze jednyj citrōłny zmiksujcie ze bazyliōm. Ubijcie biōłka- dejcie¹² dō nich poła cukru, a potyn na parze ubijcie żōłtka ze resztōm cukru (na parze, keby¹³ fto niy wiedziōł, to bydzie we misce nad gorkym ze warzōncōm¹⁴ sie wodōm). Jak już te żōłtka bydōm fajnie ubite- tak ze połra minut im dejcie–to wmiyszejcie tam citrōłna ze bazyliōm, sznapsa¹⁵ i mascarpōne. A na sōm¹⁶ kōniec poleku¹⁷ dodejcie tam biōłka.

Narychtujcie tego mocnego tyju i wyciście do niego drugoł citrōłna i wlyjcie wywar ze skōrek, tōnknijcie¹⁸ w tym miszōngu¹⁹ biszkopta i przełōżcie do formy (nojlepi taki prostokōntnyj żaroodpornyj). Jak już cały spodek bydzie połny biszkoptōw, to wyłōżcie na nie poła masy ze mascarpōne. Tera zajś²⁰przidōm²¹ biszkopty tōnkane²² we tyju i na nie reszta masy. Po wiyrchu ôstało²³ nōm już yno pociepać²⁴ fajnie te uwarzōne skōrki ze citrōłny. Dejcie to na połra godzin abo całoł noc do lodōwki i… smacznego 🙂