Nolywka ze czerwōnych jagōdkōw (Nalewka z czerwonej porzeczki)

Nojprzōd robiōłech yno ze czornych i jak fto¹ jeszcze taki niy rychtowoł², to musi to wartko³ nadrobić, bo tyn smak je niy do ôpedzynia⁴. Potyn żech bōł ciekawy, co to wyńdzie⁵ ze czerwōnych jagōdkōw. I muszą Wōm pedzieć⁶, że to tyż je niebo we gymbie: słodke, ale fajnie przełōmane tōm kwaskowatościōm. Bydzie sie czym ôzgrzywać⁷ we zima

Co potrza?

2 kg czerwōnych jagōdkōw

0,5 litra szpyrytusu

0,5 l gorzołki⁸

1- 2 szklōnki cukru

Umyte i ôbrane jagōdki wciepcie⁹ do srogi¹⁰ krauzy¹¹, zalyjcie gorzołkōm i szpyrytusym i zapōmnijcie ô nich. Jak Wōm sie spōmni¹² – te połra tydni niyskorzi¹³– to ślyjcie¹⁴ gorzołka do jaki flaszki, a jagōdki po wiyrchu¹⁵ posujcie¹⁶ cukrym (tak na oko pó szklōnki). Jak puszczōm sok, to ślyjcie go do flaszki i zajś posujcie cukrym. I tak sie mogecie pobawić połra razy, a jak już bajecie widzieć, że tego soku je małowiela¹⁷, to we jakim garcu pomiyszejcie to wszyjsko, co żejście ślywali z tyj krauzy do flaszkōw. Mogecie to przecedzić i wymiyszane wlołć nazod do flaszkōw i tera zajś niech sie to trocha przegryzie. Tak żech to robiōł pryndzyj, ale w zeszłym roku moja kobiyta dostała na gyburtstag¹⁸ wyciskarka do owocōw i to sie richtich przidołwo przi nolywkach. Cukrym żech to zasuł yno 2 razy, a potyn żech te owoce przepuściōł bez ta wyciskarka. Wyszła z tego tako gynsto breja, kero żech wrajziōł¹⁹ do krauzy i kero je idealno do przekłołdania ciasta abo tortōw. A żeby sie nic niy zmarnowało, to żech jeszcze uwarzōł kōmpot ze to, co bōło wyciśniynte i jeszcze miołech trocha jagōdkowego wina 😉 Jak dołcie mani cukru, to ta nolywka bydzie barzi wytrawno i żołdyn chop Wōm niy powiy, że to yno liker dlo babōw 😉 Smacznego 🙂