Nolywka ze aprikołzōw (Nalewka morelowa)

Łōńskego¹ roku robiōłech jōm piyrszy rołz² i musza Wōm pedzieć³, że żech sie niy spodziywoł, że to baje⁴ take dobre. Narychtowoł żech jōm tako barzi⁵ wytrawno i bez to mogecie jōm polołć nawet jakim smakoszōm ôd whisky.

Co potrza?

2 kg aprikołzōw

0,5 litra szpyrytusu

0,5 l gorzołki⁶

1- 2 szklōnki cukru

Umyte aprikołzy bez pestkōw wciepcie⁷ do srogi⁸ krauzy⁹, zalyjcie gorzołkōm i szpyrytusym i zapōmnijcie ô nich. Połra tydni niyskorzi¹⁰ ślyjcie¹¹ gorzołka do jaki flaszki, a morele po wiyrchu¹² posujcie¹³ cukrym (tak na oko pó szklōnki). Jak puszczōm sok, to ślyjcie go do flaszki i zajś posujcie cukrym. Wiyncyj żech tego niy zasypowoł, yno żech je przepuściōł bez wyciskarka do owocōw i miołech z tego jeszcze idealny dżym do smarowania tortōw i inkszych maszkytōw. Ale Wy mogecie to jeszcze zasypać i wyciōngnōńć z tych owocōw jeszcze trocha dobroci. A na kōniec uwarzcie sie z tego kōmpotu 😉

Robi sie to richtich¹⁴ ajnfachowo¹⁵, a potyn yno fajer¹⁶ dlo kubkōw smakowych.

Prost!¹⁷