Pstrōng ze sezamym (Pstrąg w sezamie)

Zdołwałoby sie, że niy ma barzi¹ ajnfachowego² dania, jak ryba we paniyrce, ale styknie³ dodać do ni jaki inkszy⁴ składnik i już mōmy blank⁵ nowy smak. Jo⁶ pomiyszoł tarto bōłka⁷ ze sezamym i tak sie myśla, że tyj rybie już wiyncyj niy trza⁸.

Co potrza?

500 g fileta ze pstrōnga- jo żech znołd⁹ takego fajnego łososiowego

bōłka tarto (sam niy ma co tego przeliczać na łeżki, wsujcie¹⁰ trocha do miski, a jak braknie, to dosujcie 😉 )

połra¹¹ łeżek sezamu

połra łeżek mōnki

jajco

sōl i pieprz

citrōłna¹²

olyj do smażynia

Pstrōng łososiowy mo tako fajno farba¹³, jak łosoś (choć niy je taki intynsywny we smaku), delikatne miyso i do tego trocha tōńszy niż tyn właściwy. Jo żech mioł filet ze skōrōm, ale żech fajnie to miyso ôddzielōł (pamiyntejcie, że werci sie tyż jeszcze wejrzeć, czy niy ôstały sie tam jake ôjści¹⁴).

Pokrejcie pstrōnga na trocha mańsze kōnski¹⁵, posōlcie, popieprzcie i pokapejcie¹⁶ sokym ze citrōłny. Chwila niech sie tak przegryjzie. Na jednym talyrziku nasujcie trocha mōnki, na inkszym wymiyszejcie bōłka tartoł ze sezamym (tak 1/3 sezamu na 2/3 bōłki), a w trzecim łozfyrlejcie¹⁷ jajco.

Potyn obkulejcie ryba we mōnce, dejcie do jajca, a na kōniec do bōłki ze sezamym. Take ôbkulane pstrōngi wciepcie na łozgrzōny olyj, przibrōnołććie¹⁸, kapnijcie na nie jeszcze trocha citrōłny i sie biercie za jedzynie. Smacznego 🙂