Sōm1 dania tak ajnfachowe2, że sie niy mogōm niy udać- nawet, jak fto3 moł4 do warzynia dwie lewe rynce.
A jak sie Wōm moł wprać5 na mitag6 jaki wegetarianin, to recept7 mołcie idealny 😉
Co potrza?
2 małe cukinie
2 bakłażany
1 cebula
połra łeżek oliwy
sōl i pieprz
łeżeczka bazyli
łeżeczka oregano
jedna srogoł8 kulka mozzarelli
Pokrejcie9 we kosteczka bakłażana, posujcie10 solōm i odstołwcie na chwila, żeby trocha puściōł sok- niy bydzie taki gorzki. We gorku zeszklijcie na oliwie pokrōnoł cebula. Przepłukejcie bakłażana i dociepcie go do gorka razym ze prziprawami. Niech sie trocha podusi, a Wy sie bez tyn czas pokrejcie we kostka cukinie. Dodejcie do gorka cukinia i warzcie tak dugo, aż zmiynknie. Na kōniec dociepcie na chwila do reszty pokrōnoł mozzarella i za minutka mogecie sie brać ze jedzynie. Ajnfachowe? Smacznego 🙂
1ō- samogłoska w wymowie między o i u, są
2proste
3ktoś
4ma
5wprosić
6obiad
7przepis
8duża
9pokrójcie
10posypcie
Dodaj komentarz