Szałołt… niy wiym jaki (Sałatka… ;) )

We szałołtach je nojlepsze to, że idzie bele co wczajś¹ do miski, ôblołć² zōłzōm³ i mōmy danie, jak u jakego grołfa⁴. Niystety je sam zeler naciowy, a jo znōm dwie take, co zajś⁵ bydōm marudzić. Nojwyżyj niech te „Ône” sie sam dajōm zamiast zelera jakego uwarzōnego kartołfla⁶ 😉

Co potrza?

3-4 łodygi zelera naciowego

biksa⁷ zielōnego groszku

15-20 dkg wyndzonki⁸

1 papryka

1 cebula

2 jabka

2-3 kiszōne ôgōrki

gorść płatkōw ze mandli⁹

zōłza:

2 łeżki jogurtu greckego

1 łeżka majōnezu

pó wyciśniyntyj citrōłny¹⁰

trocha pieprzu

Wyndzōnka pokrejcie¹¹ we kostka i przipiyczcie. Jak już sie baje brōnołcić¹², to dociepcie tam na chwila pokrōno cebula i papryka.

Zeler, jabka i ôgōrki pokrejcie we kosteczka (ale niy przesadzejcie, bo przeca mōmy zymby¹³ 😉 ), dociepcie do tego ôdcedzōny groszek i przipieczōno wyndzōnka ze kōmratkami¹⁴. Jeszcze yno gorść mandli i fertich¹⁵. Składniki zōłzy wymiyszejcie we jaki azjetce¹⁶ i ôblyjcie niōm szałołt. Wymiyszać i zjejś. Smacznego 🙂