Kiszōnoł ćwikla (Kiszone buraki czerwone)

Nojlepsze sōm take lekarstwa, kere1 idzie ze smakym zjejś2. Kiszōnoł ćwikla je tak zdrowoł, jak poła3 aptyki: pomołgo na krew, trołwiynie, odchudzanie, cholesterol, na nyrki i wōntroba… sam szło by jeszcze pisać i pisać. Niyftorzi kiszōm buraki yno na zakwas do barszczu na świynta- bierōm zakwas, wyciepujōm buraki i szlus4. Tamte ćwikle ze zakwasu prōbowołech jejś (niy sōm tyż aż tak fajnie chrōpiōnce), ale mi sie pō nich chepie5, a te sōm idealne. Woda z tych kiszōnych ćwikli je trocha za słōno, żeby jōm pić, choć joł musza Wōm pedzieć, że tak po pó szklōnki to dołech ji rada 😉 Do zupy bōłaby idealnoł.

Co potrza?

ćwikla/buraki czerwone

do zalywy: łeżka soli na jedyn liter wody (nojlepi kamiynnyj, niyjodowanyj)

trocha korzynia chrzōnu

połra zōmbkōw czosku

trocha kminku

Niy byda Wōm pisał: dejcie na jedna krauza6 3 zōmbki czosku i 10 gr chrzōnu, bo przeca kołżdy z nołs moł inksze7 smaki, jedni lubiōm wiyncyj arōmatu ze czosku, a inksi wiyncyj ôstrości ze chrzōnu.

Pokrajejcie ćwikla na kōnski, powciskejcie do krauzy, dejcie tam chrzōn, czosnek i kminek, zalyjcie gorkōm8 wodōm ze solōm i ôstołwcie na 4-6 dni. Jak sie na wiyrchu9 bydzie zbiyrała piana, to jōm symnijcie10. Jak buraki już bydōm ukiszōne, to je przełōżcie w tyj krauzie do lodōwki, a tam to już mogōm postołć połra tydni. Take buraki to idzie zjejś do miysa, jako zagrycha albo pogryzać sie na filmie 😉 Pamiyntejcie, że po ukiszyniu tyn czosnek tyż je dobry. Smacznego 🙂

 

1które

2zjeść

3połowa

4koniec

5odbija

6słoik

7inne

8gorącą

9górze

10zbierzcie

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*