Klopse rybne ôd Tanty Eldzy (Klopsiki rybne Cioci Eli)

Na kŏżdym fajerze1 u Tanty2 Eldzy bōły take fajne małe klopse ze rybōw, kere wartko sie traciōły3. Szło by pedzieć, że to take bratheringi4, yno trocha przemelane5 bez flajszmaszyna6. Ône tyż sōm we zalywie ze ôctu i bez to mogecie je we zimnym nawet i ze dwa tydnie potrzimać, choć mie sie zdŏ, że aż tyla to niy wytrzimiecie i za pŏra dni je zezrecie 😉

Co potrza?

500 g zielōnych śledzi (niy bōjcie sie- ône niy majōm zielōnyj farby, yno tak sie gŏdo na surowe filety ze śledzia)

1 żymła7

2 cebule

1 jajco

tarto bōłka

połra listkōw bobkowych

połra kulek ziela angelskego

sōl i pieprz

łeżka cukru

1/2 szklōnki ôctu winnego abo ze jabek (choc po tōniu bydzie z ôctym szpyrytusowym)

olyj do smażynio

łeżka masła klarowanego

liter wody

jŏ żech doł tyż poła łeżeczki gorczycy i pŏra kulek zielōnego pieprzu

Żymła zamoczcie we wodzie. Śledzie pomelejcie bez maszynka, dociepcie tam poła cebuli, a na kōniec wyciśniynto ze wody żymła. Dejcie do tego niyskorzi jajco (surowe), sōl i pieprz. Ukulejcie małe kulki i obturlejcie we tartyj bōłce. Łozgrzyjcie na patelni olyj i piyczcie na nim klopse. Jak już bydōm fajnie przibrōnołcōne8, to je przełōżcie do jaki srogi krauzy abo małego bōnclŏka9.

Terŏzki trza narychtować zalywa. Pokrejcie cebula i zeszklijcie na łeżce masła klarowanego. Niyskorzi dolyjcie tam liter wody, 1/2 szklōnki ôctu, dejcie sōl, pieprz, ziele angelske, liście bobkowe, łeżka cukru (mogecie tyż dać gorczyca abo kulki zielōnego pieprzu) i niech sie to chwila powarzi. Na sōm kōniec trza zalŏć te kulki zalywōm, na wiyrch10 dać pŏra łeżek tego oleju ze smażyniŏ i dać im sie przegryjś- aby 24 godziny. Smacznego 🙂

1uroczystości

2cioci

3znikały

4śledzie opiekane

5przemielone

6maszynka do mięsa

7bułka

8przyrumienione

9garnek kamionkowy

10górę

Please follow and like us:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




2 Komentarze

  1. Moj Drogi.
    Zycza Ci i Twoji Rodzinie super fajnego Nowego Roku .Zdrowio i blogoslawiynstwa Bozego.
    Dali tych fajnych naszych ,slaskich rezeptow-bo na szczynscie jest jich kupa.

Odpowiedz na „klaudiuszkaufmannAnuluj pisanie odpowiedzi

Twój adres email nie zostanie opublikowany.


*